Sunday, December 29, 2013

අළුත් අවුරුද්දටවත් අළුත් වෙමුද?

             2013 අවුරුද්දත් අවසාන වෙන්නයි යන්නේ.හප්පේ...කාලය ගත වෙන ඉක්මණ.2014 අවුරුද්ද ලබන්න තියෙන්නේ තවත් දෙ දවසක් විතරයි. 

                 දෙසැම්බර් 31 වෙනිදා රෑට බොහොමයක් දෙනා මහා උත්සවාකාරයෙන් සමරනවා.මම මේ ඉන්න ඩුබායි රටේ බොහෝ තැන්වල "ත(ර්)ටි ෆස්ට් නයිට්" එක ගැන  තියෙන්නේ පුදුමාකාර උනන්දුවක්. ඒකත් බහුතරයක්ම පිරිමින්ට.ඔය අතරේ පාටි තියන තැන් වලට එකතු වෙන ගෑණු පරාණ ඉන්නවා පිරිමින්ට හපන්. බෝතල් කටේ තියා ගෙන බොන.එතකොට මොන වගේද කියලා නොදන්නා අය වැඩියි කියන්න මම දන්නවා. මෙහේ ඉන්න අයට නම් ඔය වගේ දේවල් මහා ලොකු සිදුවීම් නෙමෙයි.

                            පහුගිය දවසක ආධුනිකයන්ගේ සංගීත ප්‍රසංගයක් පැවැත්වුණා අජ්මාන් වල "ක්‍රවුන් පැලස් " හෝටලයේදී. මීට මාසයකට පෙර. හරියටම කියනවා නම් නොවැම්බර් 29 වැනි දින.මමත්,මගේ මහත්තයත් සාමාන්‍යයෙන් සංගීත ප්‍රසංග බලන්න යන්නේ නැහැ. ඒකට හේතුව තමයි අර කලින් සඳහන් කළ කාරණාව.

                               ගෑණු -පිරිමි බී ගත්තාම එතැන සින්දු අහන්න වෙන්නේ නැහැ.මැදට පැනලා ජාතික ගීයටත් නටන්න පටන් ගන්නවා විතරක් නෙමෙයි.මහා දරුණු වලි ඇරඹෙන්න ත් ගත වෙන්නේ බොහොම සුළු වෙලාවයි.හොටෙල් එක ඇතුලේ තිබුන ප්‍රසංගයක් නිසාත්, ඊට මා ගෞරව කරන "ජයලාල් රෝහණ "යන් පැමිණෙන බව සඳහන් වූ නිසාත් (දොරමඬලාවේ සමහර වැඩසටහන් බැලීම නිසා) එය සංවිධානය කරනු ලැබුවේ මගේ මහත්තයාගේ පාසලේ ආදී සිසුවෙක් නිසාත්,එකී මෙකී නොකී බොහෝ හේතු සාධක නිසා දුරු කතර ගෙවා ගෙන අපි දෙදෙනාත් ඒ ප්‍රසංගය නැරඹීමට පැමිණියා.රංගන ශිල්පී රොජර් සෙනෙවිරත්නයන්ද ඊට සහභාගී වුණා.

                              මුලින් මුලින් බොහොම හොඳින් පැවති ප්‍රසංගයට ටික වෙලාවක් ගත වෙද්දී නැටුම් එකතු වුණා.ගැහැණු අය නටන්න පටන් ගනිද්දී මට දැනුණා  " දැන් නම් අපිට යන්න වෙලාව හරි " බව. ඒත්.. එක්වරම හැර යා නොහැකි නිසා ටිකක් ඉවසා සිටියා. කීයට ඉවර වේද නොදැන කොහොම හරි රෑ 11.00 විතර වෙද්දී අපි දෙන්නා පිටත් වුණා.අපි ගෙදරට ඇවිත් එතැන හිටි මිතුරෙකුට දුරකථන ඇමතුමක් දෙන කොටත් වැඩසටහන ඉවර නැහැ.එළිමහන් ප්‍රසංග වල වගේ පුටු උස්සලා ගහ-මරා ගත්තේ නැති වුණාට මට නම් මහා කලකිරීමක් ඇති වුණා.

                         සංගීත වැඩසටහන බලන්න යමු කියලා මම මහත්තයාට කතා කළේ,එය යම් කිසි ප්‍රමිතියකට ඇති කියන විශ්වාසය නිසා.නමුත් එතැන කරපු ලොකුම වරද තමයි බොන්න දීපු එක.අනික එයට සහභාගී වුණේ වැදගත් යැයි සැළකෙන රැකියා කරන අයම විතරක් නෙමෙයි. එයින් අදහස් කළ දේ සමහරවිට සමහරුන්ට රිදෙන්න පුළුවන්.ඒත් ඇත්ත එයයි.අපේ රටේ ගෘහ සේවිකා කියලා එන බොහොමයක් දෙනාගේ හැසිරීම හරිම ජුගුස්සාජනකයි.රියදුරු-ක්ලීනර් ඔය වගේ අය වුණත් බොහොමයක් දෙනා දන්නේ නැහැ තමන්ගේ තත්ත්වය තියා ගෙන ජීවත් වෙන්න.ඉතින් බොහෝ වෙලාවට පොදු ප්‍රවාහන භාවිතා කරද්දී අපේ රටේ භාෂාව ඇහෙද්දී වුණත්,මම නෑසු කන් ව ඉන්න පුරුදු වෙලා තියෙන්නේ,හිතකින් නම් නෙමෙයි.ලැජ්ජාවට.90%ක් දෙනා වැරදි කරද්දී ඊට අයත් නොවන 10% හරි හැටි හඳුනා ගන්න ලේසි නැහැ.

                             ලංකාවේ ඉඳන් එද්දී එයා පෝර්ට් එකේදී පාස්පෝර්ට් චෙක් කරන කොට ලංකාවේ කියලා දැක්කාම එතැන ඉන්න අය සමහර විට හරිම අප්‍රසන්න බැල්මක් අපටත් යොමු කරන්නේ ඒ හින්දයි.අනික මෙහේ තනියම ටැක්සියකට නැග්ගොත් ලංකාවේ කියලා දැන ගත්තාම උන් බලන්නේ හවුස් මේඩ් කෙනෙක් කියලාමයි.එච්චර ඕන නැහැ.හදිසියේ වත් ලංකාවේ කෙනෙක් හමු වෙලා කතා කරත් අහන්නේ පාට් ටයිම් කරන්නේ කොහේද?.....ඔය වගේ දේවල්. ලංකාවේ ගෑනුන්ට උගත්කමට රස්සාවක් මෙහේ කරන්න බෑ කියලයි අපේම මිනිස්සුත් හිතා ගෙන ඉන්නේ.මගෙන් දවසක් කෙනෙක් ඇහුවා "ඉන්නේ company වීසා ද private වීසාද " කියලා,නොකියා ඇහුවේ කඩේක වැඩ කරනවාද?ගෙදරක වැඩ කරනවාද වගේ දෙයක්.

                           තම තමන් දැන් ඉන්න තැන ඉඳන් හිතුවොත් හැම අවුරුද්දක වගේම තවත් වසරක් උදා වෙද්දී අපි හැමදාම කරන්නේ එක්කෝ පාටියක් දානවා.නැත්නම් නිදා ගන්නවා. ලංකාවේ නම් ජනවාරි පළමුදා ඔෆිස් යන්න අළුත් ඇඳුමක් ගන්නවා. උදේම කැවුම්-කිරිබත් කාලා 10.00ට විතර වැඩ පටන් අරන් 12.00ට විතර ගෙදර එනවා.මොකද ජනවාරි පල වෙනිදා වැඩ පටන් ගන්න ඕන නැත්නම් වගතුවක් නෑ කියලා හිතන නිසා.



                            මෙහේ නම් ජනවාරි පළ වෙනිදා නිවාඩුයි.

     ඒ නිසා 31 වෙනිදාට, තානාපති කාර්යාලයේ   සර්ව රාත්‍රික පිරිත් දේශනාවක් තියෙනවා.ඒ හැර  ලොව උසම කුළුණ වුණු "බර්ජ් කලීෆා"වල ගිණි කෙළි සංදර්ශනයක් තියෙනවා.හැම තැනම බෝතල් පාටි තියනවා.කැමති කැමති විධියට 2013 නිමාව සටහන් කරන්න පුළුවන්. හැබැයි විනාඩි 10ක විතර ගිනි කෙළි සංදර්ශන බලන්න යන අයට නම් රෑ 2.00-3.00 විතර වෙන තුරු වත් ගෙවල් වලට එන්න නම් වෙන්නේ නැහැ,ඒ තරමට වාහන තදබදය.

    ඔන්න ඩුබායි ඉන්න ඇත්තෝ පින් කැමති අය පිරිත් අහන්න යන්න.ගිණි කෙළි බලන්න යනවා නම් ගෙදර එන වෙලාව ගැනත් හිතන්න.ඔය හැමෝම එකතු වෙලා දාන බෝතල් පාටි නම් ඉතින් ඉවර වෙන වෙලාවක් නැහැ නේ. ඒ කොහොම වුණත් ඒවාට යන අයත් ගෙදරට එන්න පිළිවෙලක් හදා ගන්න.පොලිස් මහත්තුරු මෙහේ හරිම තදයි......


ඉතින් එහෙම නම් හැම දෙනාටම සාමය, සතුට පිරි සුබම සුබ 2014 වර්ෂයක් හිමි වේවා......!
                            



Monday, December 16, 2013

හිතනවද මේ ගැනත් ඔබ...?

    උදා වෙන්නේ නත්තල් සමය. ඉන් පස්සේ අළුත් අවුරුද්ද. ඒ කිව්වේ ජනවාරි පළමු වැනිදා. ආයෙම සිංහල හා හින්දු අළුත්  අවුරුද්ද.ඔය කාලයට  වෙන්නේ ඉතින් අතේ මිටේ තියන කීයට හරි තට්ටු වෙන එක තමයි. කතෝලික අයට නත්තල් වැදගත් වගේම සිංහල හා හින්දු අයට අළුත් අවුරුද්ද වැදගත්.ඔය කාලයට තෑගි බෝග හුවමාරු කර ගන්න එක බොහෝ දෙනාගේ පුරුද්දක්.සමහරු ඉන්නවා මුළු අවුරුද්දකටම ඇඳුමක් පැලඳුමක් ගන්නේ හෝ ලැබෙන්නේ ඔය කාලයට විතරයි. සමහරුන්ට ඒ කාලෙට වත් නැහැ.

     පවුලක දුවා-දරුවන්ට නම් ප්‍රීතිමත්ම කාලය තමයි මේ කාලය. මොකද අම්මා-තාත්තාගෙන් වගේම සමහර විට පුංචිලා-බාප්පලා ගෙන් පවා තෑගි ලැබෙනවා නේ. මෙන්න මෙතැනදී තමයි තෑග්ගක් දෙන කෙනෙක් විධියට ඔබ බොහෝ දේ සිතිය යුතු වන්නේ.හැමෝම වගේ අළුත් අවුරුද්දට දෙන්නේ ඇඳුමක්. එහෙමත් නැත්නම් ඇඳුමක් මහගන්න රෙදි කෑල්ලක්.පිරිමි කෙනෙකුට නම් සරමක්,ෂර්ට් එකක් හෝ කලිසමක් නැත්නම් කලිසම් රෙදි කෑල්ලක්.    

          කවදා හෝ ඔබට දැනිලා තියනවද " මම මේ දෙන දේ මෙයාට ප්‍රයෝජනවත්ද ?" කියලා.සමහරවිට ලැබෙන පිළිතුර "නැහැ" විය හැකියි. අපි බොහෝ දෙනෙක් කරන්නේ "දෙන්නන් වාලේ තෑගි දීමක්"එහෙමත් නැත්නම් සමහර වැරදි කරාම කියනවා නේ මාසෙකට වතාවක් පොලිසියේ පෙනී සිටින්න කියලා.ඉතින් නො කරම බැහැ,යන්නම වෙනවා.අන්න ඒ වගේ නොකර බැරි කමට තෑගි දෙන අයත් ඉන්නවා.එහෙම කරන්න එපා.

      පෞද්ගලිකව මම නම් කැමතියි කාට හරි තෑග්ගක් දෙනවා නම් ඔහුට/ඇයට ප්‍රයෝජනවත් දෙයක් දෙන්න.ඒ වගේම මම දෙන දේ එයා පාවිච්චි කරනවා නම් එතැනයි සතුට තියෙන්නේ.අපි කෙනෙකුට යමක් දුන්නාම එයා ඒ දේ අල්මාරියේ හෝ වෙන යම් තැනක අරන් තියනවා නම්, ඒ කියන්නේ ඔහුට/ඇයට එය අත්‍යාවශ්‍ය නැහැ කියන එකයි.සමහරු  ඉන්නවා "අපෝ..    ඒක ගොඩක් වටිනවා නිකං සාමාන්‍ය ගමනකට/තැනකට පාවිච්චි කරන්න හොඳ නෑ" කියලා හිතන. ඇත්තම කිව්වොත් එයාට ජීවිතේට ඔය කියන සාමාන්‍ය තැන් හැර විශේෂ තැන් කියලා නැහැ ඒ වටිනා දේ පාවිච්චි කරන්න.ඉතින් මොකද වෙන්නේ අර තෑග්ගට.නිකම්ම පරණ වෙලා යනවා,පාවිච්චි කරන්නෙත් නැතිව. සමහරවිට පාවිච්ච්චි කරන්න ගනිද්දී ඒක දැන් අවුට් ඔෆ් ෆැෂන් කියලා පැත්තකට දානවා.

          ඔබ තෑග්ග දෙන කෙනා වෙන්න පුළුවන්. නැත්නම් තෑග්ග ලබන කෙනා වෙන්න පුළුවන්.මෙයින් ඔබ පළමු වැන්නා නම් ඒ කිව්වේ ඔබ නම් තෑග්ග දෙන්නේ... හිතන්න යමක් මිළදී ගන්න පෙර.

* ඔහු/ඇය කැමති දේ කුමක්ද?
*ඔහු/ඇය ට ප්‍රයෝජනවත් විය හැකි දේ කුමක්ද?
*අතේ ඇති මුදලට ගැලපෙනවද?
*ඔහුට/ ඇයට වඩා වැදගත් තෑග්ගද...?
          මම මෙයින් අදහස් කළේ සමහරවිට තෑග්ගකට වඩා වෙලාවට අනුව ඔහුට / ඇයට මුදල් අවශ්‍යතාවය තිබිය හැකියි. එය සමහරවිට උකස් කළ යමක් බේරා ගැනීමට හෝ ණය  වාරිකය ගෙවීමට, දරුවාට පොත්/පැන්සල් අරන් දෙන්න. ටියුෂන් ෆීස් ගෙවන්න.... ඔය වගේ දාහක් ප්‍රශ්න ඇති.

  ඔබ හා තෑග්ග දෙන්න ඔබ තෝරා ගන්නා තැනැත්තා අතර තියන සම්බන්ධයත් මෙහිදී බොහොම වැදගත්.ඔබට ඔහු/ඇය සමඟ ඕනෑම දෙයක් කතා කල හැකි අයෙක් නම්, ඔබ නිසැකවම දන්නවා ඔහුගේ/ඇයගේ වර්තමාන තත්ත්වය.එසේ නම් ඔබට නිදහසේ තීරණය කල හැකියි දිය යුතු දේ පිළිබඳව.

     මම හැම වතාවෙම වගේ මේ වතාවෙත් මගේ මහත්තයාගේ උපන්දිනයට ඔහුට මේ දිනවල අවශ්‍යව ඇත්තේ කුමක්දැයි සිහි කළා.තෑග්ගක් දෙනවා නම් හැමෝම කැමතියි අදාළ මොහොතේ එය ඔහුට/ඇයට දකින්න සලස්වන්න.ඒත්.. මම හිතුවා මේ විධියට " මගේ කැමැත්තට මොනවා හරි ගන්න පුළුවන්.ඒත් ඒකට එයා කැමති නැත්නම් එයා ඒක පාවිච්චි කරන්නේ නැහැ.පාවිච්චි නොකරනවා නම් මම අරන් දෙන දෙයින් වැඩක් නැහැ"කියලා.ඉතින් ඔහුගේ උපන්දිනයට දෙදිනකට පෙර අපට යන්න වුණා අවශ්‍ය බඩු  කිහිපයක් ගන්න. පහුවදා නැවතත් එසේ නොඑන බව මම දන්නවා. මම තීරණය කළා.අද තමයි තෑග්ග ගන්න සුදුසුම දවස කියලා.ඉතින් මම ඔහුව රැගෙන ගියා ඔහුට අවශ්‍ය යයි මා සිතූ දේ ඇති තැන් කිහිපයකට.ඉන් ඔහු එකක් අතට ගත්තා සමගම බැලුවේ මිළ.එය ටිකක් ලොකු මුදලක්.ඉතින් ඔහු කැමති වුණේම නැහැ ඊට.ඒත්..මට දැනුණා ඔහු ඊට කැමති බව."ගාණ ගැන හිතන්න එපා" මම ඔහුට කිව්වත් ඔහුගේ මුණ එතරම් හොඳ නැහැ.නිකරුනේ සල්ලි නාස්ති කරනවා කියලා.ඒත්.. මම එය මිළදී ගත්තා.මුදල් හරි හම්බ කරන්න පුළුවන්.ඒත්...ඔහු වන් සැමියෙක්....හැමවිටම මට බොහෝ සෙයින් ආදරය කරත්,නිතරම එය සඟවා ගෙන ඉන්න උත්සාහ කරන ඔහු වෙනුවෙන් වැයවෙන මුදල මට දුකක් නෙමේ.මට ආදරේ නැහැ ඔයා කිය කියා මම නිතරම කිවුවත්,කොච්චර ආදරේ කරත් වැඩක් නැහැ ඒ ආදරේ පෙන්නන්නේ නැත්නම් කිවුවත් ඔහු වෙනස් වෙන්නෙත් නැහැ.කියවිල්ල මම නවත්තන්නෙත් නැහැ. ඉතින් ගෙදර ඇවිත් ඔහු උත්සාහ කළේ එය විවෘත කරන්න.ඒක ඔහුගේ පුරුද්ද. මොන දේ අළුතෙන් මිළදී ගත්තත්,ගෙදර ආපු ගමන් ඔහුට එය දිගහැර බලන්න ඕන.මම එතැනදී ඊට ඉඩ දුන්නේ නෑ. "උපන්දිනේ දවසට දෙන්නම්.එදාට ඕන තරම් බල ගන්න."කියලා ඒක උදුරලා අරගෙන මම හැංගුවා.එවෙලේ කේන්ති ගත්තත් මම දන්නවා ඒක ඇත්තටම කේන්ති ගිහින් නෙමෙයි කියලා.ආයේ උපන්දිනේ දවසේ උදෙන්ම උපන්දින කාඩ් එකක් එක්ක තෑග්ග දුන්නේ.එතකොට එයා කිව්වේ "අපි දන්නවා මොනවාද තියෙන්නේ කියලා..."

           කළින් ඔහුට කියද්දී ඔයාගේ උපන්දිනේට දෙන්න දෙයක් ගන්නයි කියලා එයා කිව්වේ " ඉතින් එතකොට මම දන්නවා නේ මට දෙන්නේ මොකක්ද කියලා" කියලයි.

           "මොකද වෙන්නේ එතකොට.මම කැමති -ඔයා අකමැති දෙයක් ඔයාට නොදැන හොරෙන් අරගෙන උපන්දිනේ දවසේ උදේ ඔයාගේ අතේ තියනවාට වැඩිය හොඳයි ඔයා කැමති දෙයක් ඔයාට දෙන එක " කියලා.

   මම දන්නේ නැහැ කොයි තරම් දුරට මම හරිද කියලා ඒත්..මම හිතන්නේ එහෙමයි. ඔහුගේ හෝ ඇයගේ අවශ්‍යතාවයක් ඇතිනම් පමණයි අපි දෙන තෑග්ගක වටිනා කම තියෙන්නේ.ඒ වගේම තෑගි ගන්න ඔබත්,සිතන්න ඕන තෑග්ගේ මුදල්මය වටිනාකම නෙමෙයි ඔහු හෝ ඇය ඔබට තෑග්ග තෝරද්දී වුණු මහන්සිය.සමහරවිට එය බොහොම ලාභ දෙයක් විය හැකියි.

   උදාහරණයක් විධියට කෙනෙක් බාල රෙදි කෑල්ලක් මිළට ගෙන,  නිර්මාණාත්මක යමක් කරනවා දින ගණනාවක් මහන්සි වෙලා.ඔබට තෑග්ගක් විධියට දෙන්න.එය තමයි ඔහුගේ හෝ ඇයගේ ඔබට ඇති ආදරය,ලැදියාව හිතවත්කම.කඩෙන් යමක් මිළදී ගෙන අරුමෝසම් බහාලුමක දාලා පොෂ් විධියට දෙනවාට වඩා අර වගේ දේක මට නම් වටිනාකම වැඩියි.එහි තියන ලෙන්ගතුකමත් එකතු වුණාම,වටිනාකම කියා නිම කරන්න බෑ.

         මට ඔහු වෙනුවෙන් එවැනි දෙයක් කරන්න බැහැ.උදේ හවස ගෙදරින් පිටවෙන්නෙත්-ගෙදරට ගොඩ වෙන්නෙත් එකටම වෙච්චි කොට ඔය වගේ දෙයක් කරද්දී ඔහු නිතරම දකිනවා.අනික එහෙම දෙයක් දැන් ඵලක් නැහැ.අපි දෙන්නාම එකම නිවසේ නිසා.ඒ නිසා ඔබ තේරුම් ගන්න තෑග්ග දිය යුත්තේ කාටද? ඒ කුමක්ද කියා....

          තව සමහර අය ඉන්නවා තමන්ගේ සොයුරියට ඇඳුම් ගනිද්දී "ඕවා මට තේරෙන්නේ නැහැ.ආ..මෙන්න සල්ලි.ගිහින් ඇඳුමක් ගන්නවා...." කියලා සල්ලි දෙන සහෝදරයන්.එහෙම කරන්න එපා.නංගිලා/අක්කලා කැමතියි තමන්ගේ අයියා/මල්ලි තෝරන ඇඳුම් අඳින්නත්.හැබැයි ඊට කලින් මතක් කරන්න ඒක එහෙමද කියලා.සමහරුන්ට කොච්චර හොඳ එකක් දුන්නත් හරි නෑ.තමන්ගේ සහෝදරිය දෙවැනි ජාතියේ නම් හොඳම දේ සල්ලි කියක් හරි දෙන එකම තමයි.මොකද තෑගි දීලත් බැනුම් අහන්න ඕන නැහැ නේ.

 තව ලියන්න නම් දේවල් තියනවා.ඒත්.. හිතුවට වඩා ලිපිය බොහොම දිග වුන නිසා දැන් නවතින්නම්.



Thursday, December 12, 2013

නොවෙනස් කළ හැකි අතීතය......

    
             ගමේ ජිවිතේ... කතාවේ ලියවුණු සුන්දර ගමේ තංගල්ල පහළගොඩ අපේ අම්මාගේ මහා ගෙදර තමයි ඒ කාලේ අපි හිටියේ.අපි උපදින්නත් පෙර 1980 ජූලි වර්ජනයට සහභාගී වීම නිසා රැකියාව අහිමි වුණු මගේ තාත්තාට ආයෙම රැකියාවක් ලැබෙන්න කොච්චර කාලයක් ගත වුණාද කියන්න මම හරියාකාරව දැන ගෙන නො හිටියත්,මට යාන්තමට මතකයක් තියන කාලේ පවා තාත්තා වෙන වෙන පොඩි බිස්නස් කරමින් අපිව ජිවත් කෙරෙවුවා.(ඒවාට බිස්නස් කිව්වොත් අපි කරන ඒවාට මොනවද කියන්නේ කියලා බොහොම ලොකුවට ඔය අංශයේ රැඳී ඉන්න අය මට සත්තම දමාවි.)ඇත්තටම මට මතකයි පාපැදියේ ගෝනි පිටින් පටවා ගත් රටකජු හේන් වලින් අරන් ඇවිත්, පොතු සුද්ධ කරලා පොඩි පැකට් වලට ගහලා කඩවල් ගාණේ අරන් ගිහින් දැම්මා.ඒ පැකට් එකක් රු.2.00ක් විතරයි.මම දන්නේ නැහැ එයින් යන්තමට ජීවත් වෙන්න තරම්වත් මුදලක් ලැබුණාද කියලා. ඊට අමතරව තව මොනවා හෝ කරන්නට ඇති. ඔය රටකජු ගැන මතකයේ තියෙන්න හේතුවක් තියෙනවා.

                   අපිත් කොයි තරම් පොඩි වුන් වුණත් අපටත් මහවුන් කරන දේවල් ඕන නේ. ඉතින් තාත්තා කරන්නේ රටකජු ගෝනිය බිමට හලලා අපිව බිමින් තියනවා තව පොඩි භාජනයක් එක්ක.අපට තියෙන්නේ රටකජු පොතු සුද්ධ කරලා හොඳ කජු ඇට අර භාජනයට දාන්න.පැකට් කරද්දී,ඒ භාජනේ තියන කජු ටික වෙනම අරන් පැකට් කරනවා.කොච්චර පැකට් ගණනක් එනවාද බලලා,පැකට් එකකට සතයක් හෝ දෙකක් (මට ගාණ මතක නෑ.)දෙනවා.ඉතින් අපි බලන්නේ පුළුවන් තරම් වැඩිපුර ප්‍රමාණයක් සුද්ධ කරන්න.ඔය අතරේ රට කජු ඇටයක්-දෙකක් හොරෙන්ම බිමට අත හරින්නත් අමතක කරන්නේ නැහැ.අවසානයේ ආයෙම අර පොතු ඔක්කොම අවුස්සනවා. "අනේ මෙන්න හොඳ රටකජු එකක්" කියලා හෙමින්ම කටේ දා ගන්නවා.අපි බිමට දමන කජු වලට අමතරව සමහර වෙලාවට වැඩිපුරත් බිම තියනවා,ගෝනිය පිටින් බිමට හලද්දී පොතු ගැලවුන ඒවා.පුංචි කමට අපිත් -අපි සුද්ධ කළ ඒවා කන්නේ නැහැ.ඒ වගේම සුද්ධ කරන අතරේ කටේ දාගන්නෙත් නැහැ.ඒවායෙන් සල්ලි ලැබෙන බව අපි දැන ගෙන හිටියා. ඔක්කොම ඉවර වුනාම තමයි පොතු ටික අවුස්සන්නේ.

              කොහොම හරි මට අවසානයේ රු.පහයි සත .....ගණනක් එකතු වුණා.ඒත්...අද වෙනතුරු ලැබුණේ නම් නැහැ.නංගිට නම් මොන්ටිසෝරි යද්දී ඒ වෙනුවට කියලා වතුර බෝතලයක් අරන් දුන්නා. මං අදටත් කියන්නේ මගේ ගාණත් එකතු කරලා එයාට නම් වතුර බෝතලයක් වත් ලැබුණා මට තමයි මොනවත් නො ලැබුණේ කියලයි.

               ගෝනාපීනුවල (ගාල්ල දිස්ත්‍රික්කයේ ) තාත්තාගේ යාළුවෙකුට වයින් ස්ටෝර්ස් එකක් තිබුණා.රස්සාව නැති නිසා තාත්තා ඔතැන වැඩටත් ගියා.අපි ඉපදෙන්න කළින් කොහොමද කියලා දන්නේ නැතත් අපි උපන්නාට පස්සේ අරක්කු-සිගරට් නො බිව්වා විතරක් නෙමෙයි ඒවා බොන කිසිම යාලුවෙක් වත් ගෙදරට එක්ක ගෙන ආවේ නැහැ.එහෙම හිටිය තාත්තාට ඒ වගේ තැනක රස්සාව කරන්න වුණා.ඔය කවුරු ගෙදරට එක්ක ගෙන ආවේ නැතත්,සීයා බීලා ගෙදර එන එක නවත්වන්න කියලා තාත්තාට කියන්න පුළුවන් කමක් නැහැනේ.අනික එයාගේ ගෙදරම ඉඳගෙන.ඒත්... අපට ඒ ගැන නම් ලොකු මතකයක් නැහැ. මොකද ඒ වෙද්දී අපි ගොඩක් පුංචියි.

                 ඔය අතරේ යම් දිනක තාත්තාට ආයෙම රැකියාව ලැබුණා.ඒ කවදාද,එදා දවස ගෙවුණේ කොහොමද මම දන්නේ නැහැ.තාත්තා වැඩ කළේ තංගල්ල ප්‍රාදේශීය ලේකම් කාර්යාලයේ ලිපිකරුවෙක් විධියට.

                  සීයා අසනීප වෙන්නේ ඔය කාලයේදී.වෙනම ගෙදරකට යන්න පුළුවන්කම තිබුණත්, තාත්තා ඒ ගැන කිසිම තැකීමක් නොකළේ "මට රස්සාව නැති කාලේ වැටිලා ඉන්න දුන්නා. දැන් තාත්තා අසනීප වෙච්ච වෙලාවේ මට කර අරින්න බෑ" කියලා.

                       සීයාට තිබුණේ පිළිකා තත්ත්වයක්.මට මතක විධියට බඩවැල් වල.ආත්තම්මාත්,සීයාත් තාත්තාට ආදරේ කළා,මාමලාටත් වැඩිය.සමහර දවසට මාමා කෙනෙක් ආත්තම්මාව කේන්ති ගස්වන්න කියනවා "ඔවු ඉතින්,අපි නෙමෙයි නේ අම්මාගේ පුතාලා." කියලා.සීයාට කරාපිටිය ස්පිරිතාලේ නැවතිලා ප්‍රතිකාර ගන්නත් වුණා.කවුරු හරි එයා ළඟ නතර වෙන්න වුණා,තනියම එයාගේ වැඩ කර ගන්න බැරි නිසා.තාත්තා එයා ළඟ ඉන්න දවසට සීයාට හරි සතුටුයි.කොහොම හරි දොස්තරවරු කියලා තිබුණා සීයාට ජිවත් වෙන්න වැඩි කාලයක් නොමැති බව.ඉතින් එයා කැමති විධියට ජීවත් වෙන ටිකේ ඉන්න දෙන්න හැමෝම තීරණය කළත්,මාමාලා ඉන්න දවසට ටිකක් දරදඬු විධියට සීයාව පාලනය කරන නිසයි,තාත්තා ඉන්න එක ගැන එයා සතුටු.

                        ගෙදර ගෙනාවාම වුණත්, කෑම-බීම ටික තාත්තා තමා දුන්නේ. බෙහෙත් වුණත් තාත්තා හෝ අම්මා  දුන්නාම බාධා කිරීම් නැතිව බිවුවා.ඒත් ඉතින් හැම දෙනාම දැනගෙන හිටියා,ඒ ගෙවී යන්නේ සීයාගේ අවසාන දවස් කීපය කියලා.ඒ දවස් වල අපි හිටියේ ගෙදර ඉස්සරහා කාමරේ.ඒකට දොර තිබුණේ ගෙදරට පිටතින්.සීයාට කෑම-බෙහෙත් ටික දීලා තමයි අම්මත්-තාත්තත් කාමරේට එන්නේ.කොයි තරම් දැන ගෙන හිටියත් සීයා මෙලොව හැර යන බව,සීයා නැති වුණා කියලා දැන ගත්ත මොහොතේ තාත්තා ඉකි ගහ ගහා ඇඬුවා.සීයාව එම්බාම් කළෙත්, ගෙදරමයි.අපි පුංචි නිසා අපට ඒ පළාතේ වත් එන්න දුන්නේ නැහැ.  

                          ඉන් පස්සෙත් අපි වෙන පවුලක් කියලා වෙනම ගෙදරක නතර වෙන්න යන්න ඕනෑකමක් තාත්තාට නො තිබුණ නිසා, තාත්තා ඉන්න තුරාවට අපේ කියලා ගෙයක් තිබුණේ නැහැ.ඒත්.... තාත්තාත් නැති වුණාම, අම්මාට ඒ ගෙදර ඉන්න හිත දුන්නේ නැහැ.ඒ වගේම අම්මාට ඕන වුනේ නැහැ මහා ගෙදර එයා නමට ලියා ගන්න.අම්මා පවුලේ දෙවැනියා. එයාට බාල සහෝදරියන් වගේම සහෝදරයන් දෙන්නෙක් හිඳිද්දී එයාලගේ අයිතිය උදුරා ගන්න අම්මාට ඕන වුණේ නැහැ.ඉන්න හරි හමන් තැනක් නො තිබුණ ලොකු මාමාට ගේ ලියනවාට, පුංචි මාමාත් කැමති වුණා. (ගේ අයිති විය යුතු පුංචි මාමාට වුණත්). තාත්තා නැති වෙලත් අවුරුදු 2ක් මහා ගෙදර අමාරුවෙන් ගෙවා දාපු අම්මා,අපිවත් එක්ක ගෙන හම්බන්තොටට ආවා. ඒ අම්මාගේ අක්කාත් හම්බන්තොට හිටිය නිසා,ඒ පැත්තෙන් පුංචි ගේ කෑල්ලක් සල්ලි වලට අරන් අපි පදිංචි වුණා.ඔන්න ඔය විධියට ගමේ ජීවිතෙන් අපි සමු ගත්තා.



Thursday, December 5, 2013

මුදලට ආත්මය පාවා දීමක්ද?

          කසුනි දීපාල් එක්ක විවාහ වුණේ වසර ගණනාවක ප්‍රේම සම්බන්ධයකින්. කසුනිගේ ගෙදරින් ඒ හැටි මනාපයක් නො තිබුණත් ලොකු බාධා කිරීමක් නැතිව කසුනි-දීපාල් විවාහයට ඇගේ ගෙදරින් අවසරය ලැබුණා. තමන් දුටුව හැම හීනයක්ම සැබෑ වුණා කියලයි කසුනි හිතුවේ.




                      ඒ වගේම කසාදෙන් පස්සේ මහ ගෙදර නවතින්න ඒ දෙන්නාගේම කැමැත්තක් තිබුණේ නැහැ වගේම දෙපැත්තේම දෙමවුපියන් වුණත් ඒ දෙන්නා වෙනම ජිවත් වෙන එක ගැන කිසි විරුද්ධත්වයක් දැක්වුවේ නැහැ.ඒ නිසාම ගෙයක් වෙනම හදා ගන්න තුරු කුළියට නවතින්න තැනක් දීපාල් බලලා තිබුණ නිසා කසුනිත් බොහොම කැමැත්තෙන් ඒ ගෙදරට ගියා. වයසක පිරිමි කෙනෙක් සහ ගෙදර වැඩට මැදිවියේ ගැහැණු කෙනෙක් වගේම වත්තේ පිටියේ වැඩට තවත් පිරිමි කෙනෙකුත් තමයි ඔය කියන ගෙදර හිටියේ.කසුනිගේ තාත්තාගේ වයසේ විතර වුණු කුලරත්න තමයි මේ ගෙදර අයිතිකාරයා වුණේ.ඉතින් කසුනි හිතුවා තමන්ගේ ආරක්ෂාවටත් මේ තැන හොඳට ගැලපෙන බව. මොකද දීපාල් දවල් දවසේ රැකියාවට ගිහින් එන්නේ හවස් වෙලා. ඇය රැකියාවක් කළෙත් නැහැ.

                         මේ ගෙදර තිබුණේ එක නාන කාමරයක් විතරයි. වෙන කවුරුවත් ගෙදර නතර වෙලා නොහිටිය නිසා ඒකේ ඒ හැටි ප්‍රශ්නයක් වුනේ නැහැ. 

                         සමහර දවස් වලට තමන් නාන කාමරේ ඉඳන් එද්දී කුලරත්න දොර ළඟ ඉඳලා ඉවත් වෙලා යන එක ගැන කසුනි කීප දවසක්ම දීපාල්ට කිව්වත් ඔහු ඒ ගැන වැඩිපුර තැකීමක් කළේ නැහැ.ඉතින් කසුනි වුණත් මහමෙරක් වගේ ඒ ගැන හිතන්න ගියේ නැහැ.එයා හිතුවේ මේ එකම නාන කාමරේ නිසා හැම දෙනාම පාවිච්චි කරන්නේ කුලරත්නට නාන කාමරේ පාවිච්චි කරන්න ඕන නිසා එන්න ඇති කියලා.ඒත් සමහර දවසට රෑට නිදා ගන්න ඇඳට ගියාම කවුරු හරි දොර ළඟ ඉන්නවා වගේ කසුනිට දැනිලා තිබුණා.දිපාල්ට කියද්දී ඒ ගැන පෙර පරිදිමයි.

                            කාලය ගත වෙලා ගියත්, දීපාල්ට තමන්ගේ ගෙයක් දොරක් හැදීමේ වුවමනාවක් නෑ කියලා කසුනිට දැනෙන්න පටන් ගත්තා.සමහර විට අතේ සල්ලිය බාගේ නැතුව වෙන්න ඇති කියලා හිතූ කසුනි දවසක් 

"දීපාල්, අපි  මේ ගෙදරට ඇවිත් කාලයක් ගෙවුණා නේ.  දැන්වත් අපේ කියලා ගෙයක් දොරක් හදා ගන්න බැළුවොත් නරකද ?"

"ඇයි..... ඔයාට මෙහේ ඉන්න බැරිද?"


"එහෙම නෙමෙයි නේ දීපාල්.අපටම කියලා ගෙයක් දොරක් තියනවා නම් හොඳයි නේ."


"ඉතින් මේක අපේ කියලා හිතන්න ඔයාට බැරිද?"


" එහෙම හිතන්නේ කොහොමද? මේක අපේ නෙමෙයි නේ. කුලරත්න අංකල් ගේ ගෙදර නේ."


           දීපාල් කතාව නැවැත්තුවා ම කසුනිට කරන්න දෙයක් නැති වුණා.තව ටිකක් ඉවසනවා කියලා කසුනි හිතුවා.

                     ඔය අතරේ දවසක රෑ කසුනි-දීපාල් දෙන්නා නිදා ගන්න ඇඳට ගිහින් ගත වුණේ බොහොම ටික වෙලාවයි.පුටුවක් පෙරළා ගෙන කවුදෝ වැටෙනවා ඇහුණේ කසුනි ලාගේ කාමරේ දොර ලඟින්මයි.කසුනිත්-දීපාල් එක්ක දඩි බිඩියේ ඇඳෙන් පැනලා දොර ඇර ගෙන එළියට එද්දී කුලරත්න පුටුවකුත් පෙරලගෙන ,කොන්ද එක අතකින් අල්ලා ගෙන කෙඳිරි ගගා නැඟිටින්න උත්සාහ කරනවා.

                      සිද්ධ වුණේ මොකක්ද කියලා වත් දීපාල් ඇහුවේ නැහැ. නිශ්ශබ්දවම කුලරත්නට නැඟිටින්න උදවු කළ එක ගැන කසුනිට නම් ඇති වුණේ මහා පුදුමයක්.

                   කිසි වෙනසක් නැතිව පහුවදා උදේ දීපාල් වැඩට ගියා.කසුනිට නම් ඊයේ සිද්ධ වුන දේ ගැන හිත හොඳක් නැහැ.ගෙදර වැඩට ඉන්න මැදිවියේ ගැහැණු කෙනාගෙන් වටින් ගොඩින් විස්තර අහද්දී ඇය පත් වුණ අපහසුව කිසිවෙකුටවත් වෙන්න නම් එපා කියලා ඇයට හිතෙන්න ඇති.

"මීට කලිනුත් මේ වගේ දෙයක් වෙලා ලොකු මහත්තයා ගුටිත් කාලා හිටියා.පවුලේ අයත් මෙයාව අත් ඇරලා වගේ ඉන්නේ ඒකනේ. හොඳ වෙලාවට ලොකු මහත්තයා කාමරේ දෙන කොටම දීපාල් මහත්තයාට කියලාම දුන්නේ. කාමරේට කුලියක් ගන්නෙත් නැහැ නේ. අනිත් එක මම කීප වතාවක්ම දැක්කා දීපාල් මහත්තයා ලොකු මහත්තයාගෙන් සල්ලි ඉල්ලා ගන්නවත්.ආයේ දෙන්නෙත් නැහැ නේ."

                       කසුනිට මුල පටන්ම හැම දෙයක්ම සිතුවම් පාටක් වගේ මැවිලා පේන්න ගත්තා.

දීපාල් හැමදාම ලා පැහැ රාත්‍රී විදුලි බුබුලක් දැල්වුවේ එහෙනම්........

කසුනි මේ ගැන කියද්දී දීපාල් කිසි දෙයක් ගණන් නොගත්තේ.....

                   මේ හැමදේම හිතෙද්දි කසුනිට ඇතිවුණේ කිව නොහැකි ලැජ්ජාවක්.තමාගේ මුළු පෞද්ගලික ජීවිතේම තව කෙනෙක් බලා ගෙන හිටියා නේද? දිපාල්ගේ වත් තමන්ගේ වත් මහා ගෙදර හිටියා නම් මේ තරම් තමාගේ පෞද්ගලික ජීවිතේට තව කෙනෙක් එබෙන්නේ නැහැ කියලා කසුන් දන්නවා. තමන් අවුරුදු ගණනාවක් ආදරය කරපු පෙම්වතා එක්ක එක වහලක් යටට වෙලා ඔහු තුරුලේ ගෙවුණ සොඳුරු කාලය තවත් අසහනකාරයෙකුට රසඳුනක් කරන්නට තරම් දීපාල් තමන්ගේ ආත්මයම පාවලා දුන්නේ මුදලට නේද කියලා කසුනිට දැනෙද්දී.......ඒ ජිවිතයම දමලා ගහලා එන්න ඇයට හිතුණා. දීපාල් හවස වැඩ ඇරිලා ගෙදර එද්දී කසුනි එයාගේ මහ ගෙදරට ගිහින් තිබුණා.


                   ඊට ටික කාලෙකට පස්සේ කසුනිගේත් දිපාල්ගේත් දික්කසාද නඩුව කොහේදෝ උසාවියක ඇහුණා.අන්තිමේ දෙන්නා දෙපැත්තට වුණා.



( පහු ගිය දවසක පත්තරයක මම කියවපු සිද්ධියක්.අපේ සමාජයට හොඳයි කියලා හිතුන නිසා මේ විදියට ලියන්න හිතුවා.)






Tuesday, December 3, 2013

ගමේ ජිවිතේ.....


        ඔෆිස් එකේ වැඩ කර කර ඉන්න අතරේ කියා ගන්න බැරි තරමේ නිදිමතක් ආවාම මට හිතුණේ මාස ගණනාවක් තිස්සේ නොසළකා හැරිය මගේම කියලා බ්ලොග් එකකුත් තිබුණා නේද කියලා. ඔන්න ඉතින් මේ පැත්තට ගොඩ වුණේ ඒ නිසයි. ඒත් ඉතින් මොනවා ලියන්නද?

       හිතුණා පුංචි කාලේ විස්තර ටිකක් ලියන්න.

       කවුරුත් කියන ලස්සන තාලේ ගමක් අපට තිබුණා.

මේක ගත්තේ නම් ගූගල් දෙයියන්ගෙන්.


        
      ඉතින් මේ වගේ ලස්සන ගමක ගෙවුණ කුඩා කාලයේ ඒ ගැන ලස්සන චිත්‍රයක් තිබුණේ නැහැ අපේ හිත්  වල නම්. මොකද ඔය හැමදේටම වැඩිය අපට දැනුණේ ඒ තුල තිබුණ අපහසුව.වාහනයක් නැත්නම් ගෙදර එන්න විදියක් නෑ. ටවුන් එකට එන්න දුරයි.. ඔය වගේ දේවල්.ඒ කාලේ අපි පුංචි අය. මට වයස අවුරුදු 10ක් වෙනතුරු තමයි අපි ගමේ හිටියේ.
   දැනට වුනත් ගමේ ගිහින් එනවා කියන අදහසින් ගියොත් මිස යැවෙන්නේ නැහැ.දැන් කොහොමත් මේ දුරු රටවල් වලට ආවාට පස්සේ ලැබෙන කෙටි කාලය මදි දෙපැත්තේ ගෙවල් දෙකේ ගෙවලා දාන්නත්.


      ඒත් ඒ ගෙවපු කාලේ සුන්දරයි කියලා හිතෙන්නේ දැන් ඉන්න ළමයි ගෙවන ජීවිත දැක්කාම.අපි පුංචි කාලේදී අපි ළඟ පුංචි අම්මලා දෙන්නෙක් හිටියා.මාමාලා දෙන්නෙක් හිටියා. වැඩි දුරක නොවුණ දුරින් තාත්තාගේ නෑ පරපුර හිටියා.ඔය කාලේදී පුංචිලා, මාමලා,නැන්දලා ... බොහොමයක් අය විවාහ වෙලා හිටියේ නැති නිසාම එයාලා අපි එක්කම හිටියා.එක පුංචි අම්මා කෙනෙක් එයාගේ ආසාවට ඇඳුම් මහා මහා අපට අන්දවලා හැඩ බලමින් සතුටු වුණා. අදටත් එයා ළඟ එයාගේ ආසාවට ගත්ත ඔය වගේ ෆොටෝස් තියනවා.ඒ වගේම "මගේ එකීට ඔය විධියට එක එක මෝස්තරේ ඇඳුම් මහලා අන්දවන්න මට වෙලාවක් නැති වුනා  නේ" කියලා කියනවා. 

        මට සම වයසේ තව  සහෝදරියක් හිටියා ලොකු අම්මාගේ දුව නිමාලි.මට දෑවුරුද්දක් බාල මගේ නංගි සහ දෑවුරුද්දක් වැඩිමහල් සහෝදරයා. ඒත් ලොකු අම්මාගේ පුතා. නිවාඩු කාලයක් ආවාම අපි හතර දෙනා ඒ සම්පුර්ණ කාලයම හිටියේ එක තැනක. ඒ බොහෝ විට ගමේ. මොකද ලොකු අම්මලාගේ ගෙදර ඒ හැටි ඉඩක් තිබුණ තැනක් නෙමෙයි.අනික දුරත් වැඩි.එයාලා මෝටර් සයිකලෙන් එන්නේ. අපට ඉතින් එහෙමටවත් වාහනයක් තිබුණේ නැහැ. අපේ තාත්තාගේ ෆුට් සයිකලේ ( හුඟක් අය කියන විදියට පුස් බයිසිකලේ) විතරයි. ඒකත් තාත්තා වැඩට යනවා නේ.

        රජයේ කාර්යාලයක ලිපිකරුවෙක් විධියට වැඩ කළ තාත්තාට අපට වගේ ස්කොල නිවාඩු කාලයක් නැහැ නේ.ඉතින් බොහොමයක් ගමන් බිමන් අපෙන් ඈත් වුණා.අනික ඒ තරම් ගමන් බිමන් යන්න කාලයක් තාත්තා අපි අතරේ හිටියේ නැහැ.එයාට අපිවත් , අපිට එයාවත්  සදහටම අහිමි වුණා .


          ඒත් ඒ කෙටි කාලයේ මැකී නොමැකී තියන මතක සටහන් කිහිපයක් තවමත් තියනවා මගේ මතක ගබඩාවේ.අපේ තාත්තා ළඟ තිබුණා ප්‍රථමාධාර පෙට්ටියක්.ඔය පුළුන්, සර්ජිකල් ස්ප්‍රීට්, ගෝස්,බෙටඩින් වගේ පොඩි පොඩි තුවාල වලට දාන ක්‍රීම් වගේ දේවල්.අයියා හැම වතාවේම එද්දී අත-පය හොයා ගන්න වෙන්නේ තියන තුවාල හොඳ වුණාම. ඒ තරමට තුවාල. හැමදාම ඇඟ පත හෝදා ගත්තාට පස්සේ, රෑට අයියාව අල්ලගන්න තාත්තා එයාව සිමෙන්ති පොළවේ වාඩි කරවා ගෙන චිමිනි ලාම්පුවත්, බෙහෙත් පෙට්ටියත් කිට්ටු කර ගන්නවා. අපිත් ලාම්පුව වටේ ඉඳ ගන්නවා. තාත්තා තුවාල වලට බෙහෙත් දාන හැටි බලන්න. 


               මුලින් සර්ජිකල් ස්ප්‍රීට් දාලා තුවාල සුද්ද කරලා, මොනවදෝ ක්‍රීම් එකක් ගාලා ගෝස් කෑල්ලක් තියලා ප්ලාස්ටර් දානවා. ඔය වැඩේට සෑහෙන්න වෙලාවක් ගත වෙනවා. මොකද එකක් එයාට තියන තුවාල ප්‍රමාණය, අනෙක කෑ ගැහිල්ලයි, දැඟලිල්ලයි නිසා වන ප්‍රමාදය.


            අපටත් හරි ජොලි ඔය වැඩේ බලා ගෙන ඉන්න. අපිත් සපෝට් එක දෙනවා දඟලන්නේ නැතිව ඉන්න අත්  කකුල් අල්ලා ගෙන අයියාගේ.අපි කෙල්ලෝ තුන් දෙනා අතරේ ඉන්න එකම කොල්ලා වෙච්චි අයියා දවල් දවසේ සෙල්ලම් කරද්දී එයා පොර නේ,ඉතින් තුවාල වල බෙහෙත් දාන වෙලාවට අපි ඒ වාඩුව ගන්නවා.


             


           
         ඒ දවස් වල අපේ ස්කොලේ ඉවර වුණාම තාත්තා ෆුට් සයිකලෙන් එනවා අපිව ගන්න. එයාගේ ඔෆිස් එකට තමයි ඊට පස්සේ. දවල් කෑමට එයා යද්දී අපිව ගෙදර අරන් යනවා.ඔය වගේ දවසක තාත්තා එන්න පරක්කු වෙලා, නංගි සෑහෙන්න වෙලාවක් ගේට්ටුව ළඟ බලා ඉඳලා.(නංගි ඒ වෙද්දී එක වසරේ.) ඉතින් පරක්කු වෙලා තාත්තා ආවාම එයා තාත්තාට කියලා තියෙන්නේ, " දැන් මාව බයිසිකයේ තියාගෙන තල්ලු කරන් යන්න " කියලා. අපේ ස්කොලේ ඉඳන් තාත්තාගේ ඔෆිස් එකට යන්න ලොකු කන්දක් තරණය කරන්න ඕන.වෙනදාට තාත්තා එක්ක පයින් ඒ කන්ද පහු කරන නංගි, පරක්කු වෙලා එයාව ගන්න ආපු තාත්තට දුන්න දඬුවම තමයි ඒ.අනේ ඉතින් තාත්තාත් ඒ විධියට එයාව එක්ක ගෙන ගිහින්.හවස ගෙදර ඇවිත් තමයි අම්මාට කියලා තියෙන්නේ.



            නිවාඩු කාලෙක අපි හතර දෙනාව අල්ලා ගෙන පුංචි අම්මා වෙල් යාය ලඟට ආවා දවසක් පින්තූර ගන්න ඕන කියලා.ඒ දවස් වල හරිම ජනප්‍රියයි "ආදරයයි-කරුණාවයි"කියලා පොඩි ළමයි දෙන්නෙක් දෙන්නාට දෙන්නාගේ කර වටේ අත් දෙක දා ගෙන හිනා වෙවී ඉන්න කැලැන්ඩරේ. මට මතක විධියට ඇන්කර්-ලක්ස්ප්‍රේ හෝ නෙස්ප්‍රේ කිරි පිටි වලින් ගහපු කැලැන්ඩර් එකක්.මටත්, නිමාලිටත් ඕන වුණා ඔය විධියට ඉන්න. ඉතින් අපි දෙන්නා ඒ වගේ කරට අත දාගෙන පින්තූර ගත්තා. අපොයි...... පිස්සියෝ වගේ. හුළඟට කොණ්ඩ අවුල් වෙලා ඒ මදිවාට අපේ දත් හැලිලා...කැලැන්ඩරේ වගේ ලස්සන නෑ කියලා හිත හිතා දුක් වුණා. මොනවා කරන්නද?

   ලියන්න දේවල් තිබුණත් තව ලියන්න බෑ වගේ. කාලෙකින් ලියන්න ගත්ත නිසා වෙන්න ඇති,ටිකක් කම්මැලි වෙලා. ආයේ පස්සේ වෙලාවක ඔය වගේ පල හෑලි ටිකක් ලියන්නම්කෝ.....එතෙක් නවතින්නම්.

Sunday, July 28, 2013

සහජීවනය

                                                ඔන්න කතා කරන්න පටන් ගත්තා හිරේ විලංගුවේ පවා වැටෙන්න ඉඩ කඩ තියෙන මාතෘකාවක්,කාලෙකට පස්සේ ලියන්න අර ගත් මුල්ම අවස්ථාවේ.



                                               මවුබිම පත්තරේ තිබුණ ලිපියක් මුණු පොතේ තියනවා දැකලා අත කහනවාට වගේ ලියන්න ගත්තේ.මොකද කියනවා නම් කොච්චර හරි මම හොඳ සිංහල බෞද්ධයෙක් නිසාත්,බෞද්ධාගමික පසුබිම තුළ අන්‍යාගම් වලට පවා අපහාස කරන්නට කියා දී නැති නිසාත් බොහොමයක් වෙනත් ආගම් වලින් අපට නොසෑහෙන්න  කෙනෙහිලි කම් තියෙනවා.ඉවසනවා ඉවසනවා කියලා ඔහොමත් ඉවසන්න පුලුවන්ද?
                                 
                                        ඒ අතරේ දඹුල්ලේ මෙන්න මේ වගේ දේවල් පවා සිද්ධ වෙලා තියනවා.බලන්න හොඳින්.

                                          ඔය වීඩියෝ එක බලලා මගේ මහත්තයා කිවුවේ පන්සලේම පල්ලි හදන්න ඉල්ලන නිසා ඒකට අවස්ථාව දෙනවා නම් පල්ලි තියන ඉඩම්වල හැම එකකම පන්සල් හදන්නත් ඉඩ දිය යුතුයි කියලා.ඒ වගේ අදහසකට නම් කොයි තරම් සහජීවනය තිබුනත් මුස්ලිම් ඇත්තන්ගෙන් කැමැත්ත ලැබෙන්නේ නැති වේවි.එවුන්ගේ සහජීවනය තියෙන්නේ පන්සලේ නෝම්බි අරින්නයි,පන්සලකට උන්ට රිංගා ගන්න පුළුවන් වෙන්න පල්ලි හදන්න අපි ඉඩ දෙනවා නම් අන්න ආගමික සහජීවනය.

                       මුස්ලිම් කොල්ලෙක් සිංහල කෙල්ලෙක් යාළු කරගෙන බැඳපන්.හැබැයි මුස්ලිම් කෙල්ලෝ බඳින්න ඕන මුස්ලිම් කොල්ලෙක්ම විතරයි.හේතුව මොකක්ද?අපේ රටේ තියෙන්නේ පිතෘ මූලික සමාජයක්. පවුලක දරුවන්ට ලැබෙන්නේ පියාගේ වාසගම-ජාතිය සහ ආගම.මුස්ලිම් කෙල්ලෙක් සිංහල කොල්ලෙක් බැන්දොත් එකෙක් හරි ඒ ආගමෙන් අඩු වෙනවා කියන්නේ උන්ට මදි පුංචිකමක්.

                            හැම එකකම ලින්ක් හොයලා දාන්න විදියක් නැහැ.තව ලිපියක් මම දැක්කා.බස් වලට නගින වඩේ-රෝල්ස් විකුණන මුස්ලිම් වෙළෙන්දන් කිසිම විටක මුස්ලිම් කාන්තාවන්ට ඔවුන්ගේ වෙළදාම් නො කරන බව.ඒ කතාව කෙටියෙන් ලියන්නම් මට ලින්ක් එක හොයා ගන්න බැරි වුන නිසා.

                                       එක්තරා බසයකට මුස්ලිම් වඩේ වෙළෙන්දෙක් ගොඩ වුණේ ඔහුගේ වෙළඳාම කරගෙන යන්න.මුස්ලිම් ගැබිනි මවක් ඒ දැකලා ඇගේ සැමියාට කියුවේ ඇයට වඩේ අවශ්‍ය බව. වෙළෙන්දාට කතා කල සැමියා මුදල් දී වඩේ ඉල්ලද්දී,වෙළෙන්දා සැමියාට කිට්ටු වී ඔවුන්ගේ භාෂාවෙන් යමක් කෙඳිරුවා.සැනින් බසයෙන් බට සැමියා අසළ වු සිංහල කඩයට යනු පෙනුණා. ඔහු පැමිණියේ ඈ ඉල්ලු වඩේ පිරි බෑගයක් සමග.හිතන්න ඔබත් ඉදිරියටවත් මුස්ලිම් කඩේකින් යමක් මිළදී ගනිද්දී දෙවරක්-තුන් වරක් නොව හතර පස් වතාවක්ම.විශේෂයෙන්ම කෑම වර්ග මිළදී ගනිද්දී.
                                                   

Thursday, June 6, 2013

මිතුර , නුඹ නැතිව.......

               ඉගිල්ලිලා යනවා කාලය හිතනවටත් වඩා ඉක්මණින්.ඒත් ඉතින් අමතක කරන්නේ කොහොමද නුඹව. හැමදාමත් කියනවා වගේ.කාලය මොන යම් විධියට ගෙවිලා ගියත්, හැමදාමත් වගේ නුඹ අපේ හදවත් වලින්, නොමැකෙන ලෙසටම රැඳිලා.පිටවී යා නොහැකි ලෙසටම.

                     ඇත්තටම කෙනෙක් අසාවි, නුඹ ගිහින් අපිව අත් හැර දමලා.ඉතින් ඇයි තවමත් නුඹ ගැන සිහි කරමින් ලත වෙන්නේ කියලා.කියන්න, දෙන්න පුළුවන් පිළිතුරක්.දයාබර මිතුරේ....

                          කොහොමදැයි අමතක කරන්නේ නුඹව කියා.දකුණේ ගැට්ට කියලා අපේ නඩේ හංවඩු ගහන්න කෙනෙකුට හැකියාවක් තිබුණේ නැහැ.නුඹත්  අපි එක්ක හිටිය නිසා.නුඹ හැරුණාම "කුලියා".බැචා ලා හැමෝම කියූ ලෙසට "මහ එකා" කුලියාපිටියේ කෙනෙක්.නුඹ ගම්පොලින්. 

                       
මේ නුඹ ෆීල්ඩ් විසිට් ගිය වෙලාවක ගත් පින්තූරයක් .මම ගත්තේ මූණු පොතේ තිබිලා.

                        අපේ කණ්ඩායමේ හිටි 10 දෙනාගෙන් 08 දෙනෙක්ම දකුණේ අය නිසා, නුඹත්-මහා එකාත් අපි එක්ක ඉන්නවාට බොහෝ දෙනෙක්ගේ  අකැමැත්තක් තිබුණට,එලියට දමන්න පුළුවන් කමක් බොහෝ විට තිබුණේ නැහැ.ඒකට හේතුව සමහරවිට නුඹ හැරුණු කොට අනිත් හැමෝගෙම කටවල් එච්චර හොඳ නැති බව දැන ගෙන හිටිය නිසා වෙන්න ඇති.අනික කොයි තරම් අපි එක කණ්ඩායමක හිටියත්,අනිත් අය වෙනුවෙනුත් කාලය කැප කළ නිසාත්, බැච් එකේ තිබුණ මොන function එකට වුණත් බැහැලා වැඩ කරපු නිසාත්, අපි ඒ ගැන ඒ හැටියට තැකුවේ නැහැ.

                First Semester එකෙන් පස්සේ training දාන දවසට කළින්  දවසේ, හොස්ටල් එකට වෙලා ඉකි ගහ ගහ අඬපු හැටි මතකද යාළුවේ....ඒ අපේ පළමු වෙන්වීම.ඒක අපිට හරියට දැනුණා.හැමදාම උදේට හවසට අපි එකිනෙකාට මිස් කෝල් එකක් දීලා අපේ මතකය තුළ නුඹලා ඉන්නවා කියලා එකිනෙකාට දැන්වුවා.මොකද ඒ කාලේ කෝල් එකක් දෙන්න තරමට අපි හැමෝම ළඟ ෆෝන් තිබුණේ නැහැ.අනික සල්ලිත් නැහැ. ගෙවල් වල තියන ෆෝන් වලින් ඔය හැටියට කතා කරන්නත් බැහැනේ.

            අනේ! නුඹ සාමාජිකයෙක් වෙලා union එකේ විඳපු වදයක් අපි නිසා. මොකක් හරි මන්ද මානසික වැඩක් union එකෙන් කළොත්,බැනුම් ඇහුවේ නුඹ.ඒකත් අතින් කයිට් කරන්.අපි මිස් කෝල් දෙක-තුනක් දීලා තිබුණා නම්, නුඹ අනිවාර්යයෙන්ම ගෙදර හිටියොත්,ගෙදර ෆෝන් එකෙන් ගන්නවාමයි.එහෙම අරගෙන බැනුම් අහලා වුණත්, ආයේ ආයෙම කරන්නෙත් ඒ දේම තමයි. කවදාවත් නුඹ බැන්නේ නැහැ අපිට.

            Second Semester එක ඉවර වෙද්දී අපේ කණ්ඩායම එකිනෙකාගෙන් ටිකක් දුරස් වෙලා.විහිළු දුර දිග ගිහින්,අනවශ්‍ය විධියට පිටස්තරයන් ප්‍රශ්න වලට ඇඟිලි ගැසීමෙන්.(ප්‍රශ්නයට අදාළ වුණු කෙනාට පිටස්තරයෙක් නො වූ නමුත් අපේ අධ්‍යාපන ආයතනයට පිටස්තරයෙක් වූ කෙනෙක් හොස්ටල් එකට පැමිණ ප්‍රශ්නයක් ඇති කර ගැනීම නිසා )

                       ඒ මොන දේවල් වුණත්, නුඹ හිටියා අපි දෙපැත්තටම අවශ්‍ය වෙලාවට.කවුරුවත් අමනාප කර ගන්න නුඹට ඕන කමක් තිබුණේ නැහැ වගේම,නුඹ එක්ක අමනාප වෙන්න කිසි කෙනෙකුට වුවමනාවක් තිබුණෙත් නැහැ.

                       ඇත්තටම නුඹ හොඳම හොඳ යාළුවෙක්.සහෝදරයෙක්.ඒ නිසයි අමතක නොවෙන්නේ නුඹව.ලෝකයට නො පෙන්නුවාට තවමත් නුඹ නිසා කඳුළු උපදිනවා දෙනෙතේ විතරක් නෙමෙයි හදවතේ පවා.2008.06.06 වැනි පවුකාර දිනයක් ආයේ කිසිම දවසක උදා වෙන්න එපා කියලා ප්‍රාර්ථනා කරන්නේ නුඹව අහිමි වීමට අපට හේතු වූ ආරම්භක අවස්ථාව ඒ නිසා.

                     කාට කොහොම අමතක වුණත්,කටුබැද්දේ බස් බෝම්බය නිසා නුඹ පුරා දින 05ක් සිහිසුන්ව හිටියා.බෝම්බෙට අහු වෙලා කියලා දැන ගනිද්දී මම හිටියේ සයිට් එකේ.වැඩ කරන මිනිස්සු දැක්කාද, නොදැක්කාද කියලා මට හිත හිතා ඉන්න ලැබුණේ නැහැ.මටත් හොරාම මගේ දෙනෙත් කඳුලින් පිරිලා.අද මගේ මහත්තයා -එදා පෙම්වතා (අපි දෙන්නාම එකම බැච් එකේ)තමයි ආරංචිය දුන්නේ මට කළින්ම.

              මළ-මිනී අතරේ නුඹ නැති බවත්,හැමතැනම නුඹව සොයන බවත් දැන ගත්තත්, පැය ගණනාවකට පසුව දැන ගන්න ලැබුණේ නුඹ I.C.U.එකේ ඉන්න බව. දන්නවද නුඹ ඒ මොහොතේ හිතට දැනුණ සහනය. ඒත් කී දවසක්ද තිබුණේ ඒ සහනය. ස්පිරිතාලේ දන්නා අඳුනන හැම කෙනෙකුටම කතා කරලා නුඹ ගැන හෙවුවා.

               එදා මම ගෙදර ආවේ කොහොමද කියලා අදටත් මතක නැහැ මට.මඟ දිගට තද කර ගෙන ආපු ඇඬුම ගෙට ගොඩ වෙද්දීම පුපුරලා ගියා. අඬා ගෙන ඇඳට වැටුණු මාව දැකලා අම්මා බය වෙලා හොඳටම.
නුඹව බලන්න එන්න හදද්දී අම්මා විරුද්ධ වුණා.ඔය විධියට අඬන්න තියා ගත්තොත් නුඹටත්,මටත් දෙන්නාටම හොඳ නැති බව කියලා. අනෙක් කාරණාව ඇත්තටම ඒ වෙද්දී නුඹ පෙම්වතෙක් වෙලා ඇයත් අපේ නඩේම කෙනෙක් වූ නිසා අපි හැමෝම නුඹ වෙනුවෙන් අඬන එක ඇත්තටම නුඹට නරකක් වෙයි කියලා මටත් හිතුණා.අමාරුවෙන් වුණත් නුඹව බලන්න මම නො යන්න තීරණය කළා.

         ඒත්.. බෝධි පූජා තියලා නුඹ ව සනීප කර දෙන්න කියලා අපි කී දෙනෙක් පතන්න ඇද්ද ?ඒ සේරම බොල් හුළඟට ගහ ගෙන ගිහින්,ටිකක් හොඳ අතට හැරුණ නුඹ 2008.06.11 වන දින උදේ අපි හැමෝම තනි කරලා යන්න ගිහින් තිබුණා.

           පළමු දිනයේ පටන් නුඹ මිහි මවු තුරුළේ සැඟවෙන තුරාවටම අපි නුඹ ළඟ රැඳුනා.අම්මාගේ විලාප හඬ, නුඹේ එකම සහෝදරයාගේ කඳුළු අතරට අපි හැමෝමත් ඉකි ගහ ගහ ඇඬුවේ එක කුස නුපන්නත් අපි අතර වූ සහෝදරත්වයට පපුව පුපුරන්න හදන නිසා.ආයේ ආයෙම එන්න අපේ අතරට.අපේ දරුවෙක් වෙලා හරි.අඳුනා ගන්න බැරි වෙන එකක් නැහැ නේද යාළුවේ. මං දන්නවා නුඹටත් අපිව අමතක නැහැ කියලා.

    ඉතින් රත්තරන් යාළුවේ...........නුඹ නැතිව මේ ගෙවෙන  05 වන අවුරුද්ද.ආයෙම එන්න. බලා ඉන්නවා අපි, සුපුරුදු සහෝදරත්වයෙන් වැළඳ ගන්න එදා වගේම.

         අද පෝස්ට් කරන්න ඕන නිසා draft කරලා තිබ්බේ.අද වගේ නරක දවසක් මීට අවුරුදු 05 කට කලින් උදා වුණා කියලා අමතක අය ඉන්නවා නම් මතක් වෙන්නත් එක්ක. ඉතින් රත්තරන් යාළුවේ සුබ ගමන් නුඹට ආයේ පරිස්සමෙන් එන තුරාවට.බුදු සරණයි නුඹට...
                         
                      

Sunday, June 2, 2013

එහෙන් මෙහෙන්.....


     වෙනදා වගේම වැඩ ඉවර වෙලා මෙට්‍රෝ එකෙන් බැස්සා union එකෙන්.අප්පා... රස්නේ කාලේ පටන් අරන් නේ.ඒත් ඉතින් මොනවා කරන්නද? ගෙදර නොගිහින් ඉන්නද.බැහැනේ.

           හැමදාම වගේ හිතට නැඟෙන සිතුවිල්ල හිත ඇතුළේම හංගා ගෙන පයින්ම යන්න පටන් ගත්තා al-baraha අපේ පුංචි ගේ පොඩිත්ත හොයා ගෙන. Union ඉඳන් පයින් ගෙදර එන්න පටන් අරන් දැන් අවුරුදු 2කට කිට්ටුයි. කොටින්ම කිවුවොත් රස්සාවට ගිය දවසේ පටන්ම තමා.මුල් දවස් වල විනාඩි 20-25 අතරේ කාලයක් ඇතුළත ගෙදරට එන්න පුළුවන් වුණත්, දැන් නම් ආසාවටවත් ඒ කාලය ඇතුළත ගෙදරට යන්න බෑ.එකක් තමා එළියේ තියන රස්නය නිසා මගේ ගමන් වේගය අඩු වීම.අනික තමා ස්ටේෂන් එකෙන් එළියට එද්දිම හිතට දැනෙන දේ.ඒ කිවුවේ "අපෝ...දැන් ඉතින් පයින් යන්න ඕන නේ..."කියන මන්දෝත්සාහී හැඟීම.දැන් අනිවාර්යයෙන්ම පැය භාගයකට වඩා යනවා යනවා මයි.

                  ඔන්න ඔය වගේ මන්දගාමී ගමනින් ඊයේ වැඩ ඉවර වෙලා පයින් ගෙදර යන අතරතුරේ සිග්නල් එකක් ළඟදී නිළ ඇඳුමක් ඇඳලා ගියා කෙනෙක්. නිළ ඇඳුමේ විධියට නම් ඔහු Driving School එකේ instructor කෙනෙක්.ඒ නිළ ඇඳුමේ තියෙනවා ඊටම අදාලව බෙල්ට් එකක්.සමහරවිට ඒක ලොක් කරන්න ඕන එකක් වගේ වෙන්න  ඇති.අර මනුස්සයත් වැඩ ඉවර වෙලා ගෙදර යන ගමන් බෙල්ට් එකත් ගලවාගෙන.ටිකක් මහත කෙනෙක් නිසා බෙල්ට් එක නිකම්ම ගැලවිලද දන්නෙත් නැහැ.ඒත් ඉතින් ඒක දැක්කාම මගේ මුවට සිනහවක් නැංවුණේ නිතැතින්මයි.

                  හිතනවා ඇති නේද ඇයි ඒ කියලා.එහෙනම් ඉතිරි ටිකත් කියවාගෙනම එන්නකෝ.

                         මුවට නැංවුණු සිනාවත් හා සමඟම ක්‍ෂණයකින් සිහියට ආවේ මගේ පාසල් සමය.ඒ මීට වසර ගණනාවකට පෙර බව සැබෑව.කුඩා දැරියකව සිටියදී මවු තුරුලේ හිඳිමින් පාසල් මවුන් හමුවට යා නොහැකි වුණත්,උසස් පෙළ පන්තියට ආවේ පවුලේ ඇත්තන් අතරේම හිඳිමින්.සාමාන්‍ය පෙළ කළාට පසුව වෙනත් පාසලකට ගිය නිසා නෙමෙයි.බාල නැගණිය නිසාවෙන් අම්මාටත් පාසල අසල නිවසක් බදු අර ගෙන ඉන්න වුන නිසා.ඉතින් පාසල් ගේට්ටුවෙන් එළියට බැස්ස ගමන්ම,ගෙදර දුවන්නේ නැතත් ගෙදරට ඇතුල් වෙන්නත් කලින්ම යුනිෆෝම් එකේ බෙල්ට් එක ගලවන එක තමා කරන්නේ. සමහර විට මඟදීම.හරියට ඒක තමයි ලොකුම කරදරය වගේ.

                   ඊට පස්සේ සපත්තු දෙක අව්වෙම ගලවලා දාලා කකුල් දෙක පිච්චි පිච්චි ගෙට දුව ගෙන එනවා.මොකද අපි හිටිය ගෙදර මිදුල වගේ තිබුණේ ඊට පහළ ගෙදර වහල.ඉතින් කොන්ක්‍රීට් එක දවල් 2.00 විතර වෙද්දී කොහොමද කියලා අමුතුවෙන් කියන්න ඕන නැහැ නේ.

                  සමහර දාට යුනිෆෝම් එක පිටින්ම දවල් කෑම එක ගිල දාලා ඊට පස්සේ තමයි නිදහසේ ඇඳුම් මාරු කරන්නේ.

               අතීත මතක අතරේ සැරි සරද්දී දන්නෙම නැතුව ගෙදරටම ඇවිත්. හ්ම්... ආයෙමත් පුරුදු ජීවිතය.රෑට ඉවීම.කෑම.වලං-පිඟන් සේදීම. නින්ද. පහුවදා උදේ ආයෙමත් කාර්යාල පැය 8.නැවත නිවස. ඉවුම්-පිහුම්,අස්  කිරීම්,පිරිසිදු කිරීම් හා පිරිසිදු වීම්.........







Saturday, May 11, 2013

ආශ්චර්යමත් උයනේ වරුවක්.......

              හැමදාම වැඩට යනකොට මෙට්‍රෝ එකේ තමා යන්නේ.ඔෆිස් එකෙන් ට්‍රාන්ස්පෝට් දෙන්නේ නැහැ නෙව.ඔය විධියට හැමදාම යද්දී එකම මූණු ටික තමා දකින්න ලැබෙන්නේ.වාඩි වෙලා යන්න ඕන නම් මෙට්‍රෝ එකේ දොර ඇරෙද්දීම පැන ගන්න ඕන ඇතුළට.හොඳ අවධානෙන් නොහිටියොත් තත්පරයට සීට් එක වෙන කෙනෙකුගේ අයිතියට නතු වෙනවා.

                  උදේට කොහොම හරි වාඩි වෙලා යන්න පුළුවන් වුණා කියමුකෝ.ආසාවට වගේ හවසට නම් වාඩි වෙන්න ලැබුණේ මේ ගෙවුණ අවුරුද්දකුත් මාස අටට ම දවස් 10-12ක් තමයි.ලියන්න පටන් ගත් දේට කොහොමටවත් අදාළ නැති වල් බූත කියවනවා නේද?කමක් නෑ තව ටිකයි. ( මොකක්..........? තවත් ටිකක්..) 

                       ඔය මෙට්‍රෝ එකේ යන අතර තුර හමු වුණා අපේ රටේ ඇත්තන් කීප දෙනෙක්. එයින් කෙනෙක් තමයි මට මේ ආශ්චර්යමත් උයන ගැන කිවුවේ.පැය බාගයක දුර යන අතරේ කියව කියවා යන දේවල් අතරට මෙන්න මේ කතා බහත් ඇතුළත් වුණා.

" ගියේ නැද්ද Miracle  Garden බලන්න."

"මොකක්ද ඒ. කොහේද තියෙන්නේ...."

"මෝටර් සිටි එකට කිට්ටුයි.Sheikh  Zayed Road එකේ යද්දී පේන්නේ මෝටර් බයික් එකක යන මිනිහෙක්.අන්න ඒ කිට්ටුව."

"අනේ මම ඔය පාරවල් ගැන දන්නේ නැහැ.මගේ මනුස්සයාගෙන් තමයි අහන්න ඕන."

"පුළුවන් නම් යන්න.හරි ලස්සනයි."

                         ඔෆිස් එකට ආපු ගමන් අන්තර්ජාලයට රිංගුවා.අප්පේ... හොඳ වෙලාවට තමයි මේ අන්තර්ජාලේ ඔක්කොම දේවල් හොයා ගන්න පහසුකම් තියෙන්නේ.පාරක් හොයා ගන්න ඕන වුණත් ගූගල් දෙවියන්ට පිං. අතරමං වුණ තැනින් එලියට එන්න පාර පෙන්නනවා.

                       කවුරු කොහොම කිවුවත් ඉතින් කොහේ හරි යන්න මගේ මනුස්සයා කැමති වෙන්න ඕන නේ.වහාම ලින්ක් එක මේල් කළා,යමුද අපිත් කියලා අහලා.

"යන්න තමා හිටියේ.කවදද යන්නේ..."

"වීක් එන්ඩ් එකේ තමයි...යන්න නම් හිටියේ,ඇයි කිවුවේ නැත්තේ මට."

"surprise ....එකක් දෙන්න ඕන නිසා නොකිව්වේ."  "මේ සතියේ නම් බෑ.ලබන සතියේ යමු."

"අනේ surprise එක අපරාදේ නේද?"

                          ඔන්න ගමන ස්ථිර වුණා .මටත් ඉන්න බෑනේ.ඔෆිස් එකේ ඉන්න පිලිපීන් කෙල්ලෝ දෙන්නාටත් ගින්න දුන්නා.උන් දෙන්නාටත් ඕන නම් ගෙවල් වල අයත් එක්ක යන්නේ නැතෑ.

                             බලාපොරොත්තු වූ දිනය උදා වුණා.ඔතැනට යන්න ඕනේ හවස 3.00ට විතර කියලයි අහපු හැමෝම කිවුවේ.ඉතින් අපිටත් ප්‍රවාහන පහසුකම් හිමි කරලා දුන්නා ශ්‍යාමලී අක්කා.අපි දෙන්නා (මාත්,මහත්තයාත් ) තවත් යාළුවෙක් එක්ක ගමනට එක් වුණා. එතැනට තවත් යාළුවෙක් ආවා පවුල පිටින්. (ඒ ජෝඩුවම යාළුවෝම තමා.පොඩ්ඩ ත් එක්කම-ඒ කිව්වේ එයාලගේ පුතා ගැන.)

                          ඔන්න එහෙනම් මම ඔය හැමෝම එතැනට එක්ක ගෙන යන්නයි හදන්නේ.


                                                 එන්න ඇතුළට
                                          හදවත් හැඩයට නිර්මාණ වූ මල්
                                             එක්සත් අරාබි එමීර් රාජ්‍යයේ ලාංඡනයේ  හැඩයට

                                                             තරු හා හදවත් හැඩයන්ට
















                                                      මල් ආරුක්කු යටින්












                                                   මල් ඇල්ලක්
                                                                     වාහන වලත් මල්











                                                                    මල් පිරමිඩයක්



                                                        අනේ පුංචි වුන්ගේ කුඩ ටික



                                     ටිකෙන් ටික රෑ වෙලා .දැන් ගෙදර යන්න වෙලාව ඇවිත්
                          ආයෙමත් ඇතුල් වුන තැනින්ම එලියට.


                 බොහොම කලින් ලියන්න හිටපු ලිපියක් වුණත් කාර්යබහුල බව නිසා ප්‍රමාද වුණා. සමා වෙන්න ඕනේ ඒ ගැන නම්.

                ආයෙමත් මේ වගේ ලස්සන දෙයක් බලන්න ගියොත් ඉක්මණට ලියලා දාන්නම් හොඳේ.