Monday, September 30, 2019

මුහුණු පොතේ වික්‍රමය

   මුහුණු පොත.. එහෙමත් නැත්නම් දන්න භාෂාවෙන් කිව්වොත් facebook යනු කාලය කා දමන්නට බිහිවුණු කරුමයක් ලෙස බහුතරයක් වැඩිහිටි මතයයි. ඉන් තරුණ තරුණියන් වැනසී යනු ඇති බවට නිරන්තරයෙන්ම චෝදනා නැගේ.

අසන්නට දකින්නට ලැබෙන දේ අනුව එහි වරදක් නැත්තේමද නොවේ... එනමුදු මෙය ඊට හාත්පසින්ම වෙනස් වූ කතාවකි.

දිනය       : 2019 සැප්තැම්බර් 08 වන ඉරු දින
ස්ථානය  : බත්තරමුල්ල  අවකාශ ශාලාව 
නිමිත්ත  : මුහුණු පොතේ අකුරු අමුණන 24                      දෙනෙකුගේ කතා එක් කොට                            බිහිවුණු " සංකලන නව්‍ය කෙටිකතා                   "  පොත දොරට වැඩුම

එකිනෙකා නාඳුනන අය එකා දෙන්නා අදාළ ස්ථානයට ඇදෙමින් සිටී... අළුතින් එන තැනැත්තා තමා කවරෙක්දැයි අනෙක් අයට හඳුන්වා දෙයි. එය සැබෑවටම උප්පැන්නයේ සඳහන් නම නොවේ... එදින සැබෑ නමින් සැඟවී මුහුණු පොතේ ආරූඪ නම් වලින් ලියු බහුතරයකගේ වෙස් මුහුණු ගැලවුණු දිනයක් විය. මුහුණු පොතේ බෙහෙවින්ම ජනප්‍රිය කතා ලියන්නන්, ලියන්නියන් ආරාධනා ලැබ පැමිණි අය අතර වූහ. එසේම facebook හි page admin වරු කිහිප දෙනෙකුද ඒ අතර වූහ.

එදින උදයේ පටන් උත්සවය වෙනුවෙන් එකිනෙකා මුණ නොගැසී ඒ මොහොතේ ම දැන හඳුනා ගත්, එක පොතක ලේඛකයන් ලෙස රොද බැඳුණු සියල්ලෝ ලහි ලහියේ සූදානම් වූහ. කිහිප දෙනෙක් පොල්තෙල් පහන සැකසූහ. තවත් අය සංග්‍රහ කටයුතු වෙනුවෙන් වෙන් වූහ. ස්වාමීන් වහන්සේ වැඩම කරවීමට යාමට තවත් අයෙකුට සිදු විය.

එහා මෙහා යමින් ,එක් එක් රාජකාරීන්හි නිරත වූ "සංකලන"යෝ ස්වාමීන් වහන්සේ ගේ වැඩමවීමෙන් පසු අවකාශ ශාලාව තුළට රොක් වූයේ උත්සවයේ කටයුතු ඇරඹෙන බව දන්නා බැවිනි .

මේ සියල්ලෙහිම මූලාරම්භකයා දෝනා ත්‍රිමා නම් වූ අන්වර්ථ නාමය හිමි සොඳුරු හදවතකි.

මාස නවයක කාලයක් පුරා පෙරුම් පුරමින් බිහි වූ සංකලන ළදරුවාගේ දොරට වැඩුම දෙස පොතට හිතැති බොහෝ දෙනෙක් නොඉවසිලිමත් දෙනෙතින් බලා සිටියහ.

කුළුඳුල් පොතේ දොරට වැඩුම වෙනුවෙන් ඒ අළුත් සුවඳ විඳිමින් පොත අතට ගන්නට, පොත පෙරළා කියවන්නට සංකලනයෝම බලා සිටියහ. තමා හැර තවත් 23 දෙනෙකුගේ අකුරු මුසු වූ සුන්දර "සංකලන" කියවන්නට නොඉවසිලිමත් වූහ.




අති සුන්දර පොල්තෙල් පහනේ තිර දැල්වෙමින් අවකාශ ශාලාවේ සංකලනය කළඑළි දැක්විණ.

සංකලන වෙනුවෙන් බොහෝ වෙහෙස වූ ඉරංගි ජයවර්ධන පිළිගැනීමේ කතාව කරමින් සංකලනය ඇරඹුවාය.

කෙටිකතාවක් ලිවිය යුතු අයුරු කියවෙන අපූරු දේශනයක් දිලීප ජයකොඩි මහතාගෙන් ඉදිරිපත් වූයේ ලේඛන කලාවේ අංකුරයන්ට මහා දිරියක් වෙමිනි.

සිසිර යාපා මහතාද අනගි දේශනයක් කරමින් සංකලනය සුවඳවත් කළේය.

සැඟවී හුන් මුහුණු පොතේ සුන්දර ලියන්නියන් ද වේදිකාවට ගොඩ නැඟුණද , සැඟවී සිටීමටම රිසි බැවින් නම සඳහන් කිරීමෙන් වැළකෙමි.

පුරා පැය දෙකකට ආසන්න කාලයක් තුළ උත්සවය පැවැති අතර සඳලි අනුත්තරා ස්තුති කතාව ඉදිරිපත් කළාය. එමෙන්ම වික්ටෝරියා ස්වීනිගේ හඬද වේදිකාව මත කිංකිණි නඟනු ඇසිණ.

නිවේදක කටයුතු කළ ලක්ශ්‍රී රත්නායක මෙන්ම , සංකලන වෙනුවෙන් වෙහෙසුණු තිළිණ විරාජ් දෙදෙනාද සිහි කළ යුතුමය.


විශේෂයෙන්ම මුහුණු පොත දෙස වපර ඇසින් බලන වැඩිහිටියන්ට මුහුණු පොතෙහි මෙවන් වූ මනු ගුණ පිරි බෝසත් මිතුරන්ද සිටින බව සිහිපත් කරමින් සංකලන ඔබට පුද කරමු...







3 comments:

  1. ���� බොහොම ස්තූතියි බට්ටි අක්කා මේ වගේ පැහැදිලිව අකුරු කිරීම සම්බන්ධව.. මේ ඔබේත් මගේත් අප සැමගේත් මහන්සියේත් කැපවීමෙත් අවසාන ප්‍රථිපලයයි... නොව... මේ පළමු සංසිද්ධියයි... මෙතැන් පටන් තවත් අති දක්ෂයන්ගේ හැකියාවන් ඉදිරියට රැගෙන යනු ඇත...

    ReplyDelete
    Replies
    1. ඔව්... සංකලන ලෙසින් නොනැවතී සංකලන 2 , 3 ලෙස ඉදිරියටම යනු ඇති

      Delete

කියවලත් කියෙව්වේ නෑ වගේ යන්න එපා. ඔබේ අදහසක් වටිනවා බොහොම. තවත් එක් අකුරක් හෝ ලියන්නට...