Thursday, December 18, 2014

රෑ ස්කෝලේ ....

හොස්ටල් ජීවිතේ මොන වගේද කියලා අහන්න ඕනෑ ඒක විඳපු කෙනෙක් ගෙන්ම තමයි. ඒ කාලෙට හිතෙනවා මොකක්ද මේ විඳින කරුමය කියලා. හරියකට කන්න බොන්න නෑ . ලුණු ඇඹුල් ඇතුව කටට රසට කෑම ටිකක් ලැබෙන්නේ නැහැ. ගෙදර යන්න ලැබෙන්නේ නැහැ. ඒ මදිවාට කප්පරක් විතර නීති රීති. කාල සටහනට වැඩ කරන්න ඕන. අමාරුම කාරිය තමා උදෙන් නැගිටින්න ඕන. අපෝ..... ඒ කාලේ  විඳපු දුකක්.

ඒ ඔක්කොමත් ඉවසුව හැකි. සමාජය හොස්ටල් ළමයි දිහා බලන කැත ඇස් දිහා තමා බලාගෙන ඉන්න බැරි. ඒ කාලේ ඔය දේවල් ගැන ඒ හැටි දැනුම් තේරුම් තිබුනේ නැහැ. ඒත් ටික ටික ලොකු වෙන කොට, හොස්ටල් ජීවිතෙන් මිදිලා සමාජය ඇතුලේ කරක් ගහන කොට මොන ජරා අදහස් තියාගෙනද මුන් ඒ කාලේ අපි දිහා බැලුවේ කියලා දැනෙන කොට, සමාජය ගැන මහා අප්පිරියාවක් දැනෙන්න ගත්තා. 

කොහේ කොතැනක හරි සිද්ධ වුන නරක දේවල් නිසා, සමස්ථ හොස්ටල් ප්‍රජාව දිහාම නරක ඇහින් බලන්න මිනිස්සු පුරුදු වුණා. හොස්ටල් ජීවිතෙන් මිදිලා දැන් අවුරුදු 15කටත් වැඩියි. තවමත් මගේ කණට ඇහිලා තියෙනවා මොනවා හරි දෙයක් කිවුවාම " ආ.... හොස්ටල් නේ. අපි නො දන්න හොස්ටල්......." කියන කතාව.

සිද්ධ නොවෙනවා කියලා මට කියන්න බැහැ. සමාජය දැන් හොඳටම අපිරිසිදු වෙලා. දියුණු තාක්ෂණයත් එක්ක දැන් කාලේ ළමයි හැදෙන්නේ...එයාලා ඉන්ට'නෙට් වලින් බොහෝ දේ හොයා ගෙන යනවා.වගේම ඒකෙන් ජීවිතේ විනාස කර ගන්නවා.

මේ කියන්නේ දියුණු තාක්ෂණය ගැන වත්, විනාස කර ගත්ත ජීවිත ගැන වත් කතාවක් නෙමෙයි.

කවුරුත් වපර ඇහින් බලන, හොස්ටල් ඇතුළට කොටු වෙලා නීති ගොඩකට හිර වෙලා දුක් වින්ද අපේම අතීතයේ කතාවක්. එකම වයසේ කෙල්ලන් රොත්තක් අතරේ සිදු වුණ.

බට්ටි ඒ කාලේ වෙද්දී 11 වසරේ. අ.පො.ස. (සා/පෙළ) ට නැහී ගෙන පාඩම් කරන කාලේ. ඔය වයස කියන්නේ හොස්ටල් එකේ ඉන්න වැඩිමල් ම ළමයි. එයාලට ටිකක් නිදහස තිබුණා කාලසටහනට පිටින් වැඩ කරන්න. ඒ කිව්වේ ගේම්ස් පීරියඩ් එක, බුදුන් වඳින වෙලාව වුණත් ඒ දේවල් වලට නො ගිහින් පොතක් පතක් බලා ගන්න. සමහර විට රෑ පිරිත් කියන වෙලාවට නිදා ගන්න ඉඩක් තිබුණා. මොකද මේට්‍රන් වුණත්  දැන ගෙන හිටියා ළමයි ගොඩක් රෑ වෙනතුරු පාඩම් කරන බව. එතකොට සමහර අය ගේම්ස් වෙලාවට නිදා ගන්නවා. රෑ කෑම වෙලාවට අවදි වෙලා කෑම කාලා එක දිගට පාඩම් කරනවා.

ඩෝමෙට්‍රිය ඇතුළේ හැමෝම ඉන්නෙත් නැහැ. කොරිඩෝ එකේ පුටු තියා ගෙන තැන තැන තමුන්ටම අනන්‍ය වූ ස්ථාන වලට වෙලා කට්ටිය පාඩම් කළා. පන්ති කාමර වලින් ඩෙස්ක් එකක් ළඟ තියා ගන්නත් 11 වසර ළමයින්ට තහනමක් තිබුණේ  නැහැ. ඒ නිසා රෑට 12 .00 - 1.00 වුණත් හැමෝම නිදි නැහැ.

මේ කියන දවසේ නම් වෙලාව රෑ 7.00 ට විතර ඇති. නීලිකා වේලාසන නිදා ගත්තා හවස බුදුන් වඳින්න ගියෙත් නැතුව. හැබැයි දීපිකාට කිවුවා 7.00ට විතර අවදි කරන්න කියලා. සාමාන්‍යයෙන් එක් කෙනෙකුට විතරක් කිව්වොත් එයාට අමතක වුණොත් දිගටම නිදා ගන්න හින්දා මොළේ කල්පනා කරපු නීලිකා ,නිරෝෂා ටත් කිවුවා එයාව අවදි කරන්න කියලා මතක ඇතිවම.

ඔය විධියට කිහිප දෙනෙක් වම දැනුවත් කරලා නිදා ගත්තේ පාඩම් කරන්න ඕන නිසා. අ.පො.ස. (සා/ පෙළ) විභාගය නිසා හැමෝම හිටියේ ටිකක් තැති ගැන්මකින්. ශිෂ්‍යත්ව විභාගයෙන් පස්සේ මුණ දෙන ලොකු විභාගය නේ. ඕක පාස් වෙන්න බැරි උණොත්  උසස් පෙළත් කරලා හමාරයි. අනික විලි ලැජ්ජාව. ඈත ගම් වලින් ඇවිත්, හොස්ටල් එකේ නැවතිලා කට්ට කන්නේ කොහොම හරි විභාගේ ගොඩ දා ගන්න නේ.

කට්ටිය බුදුන් වැඳලා ඇවිත් හවස් වරුවේ පාඩම් කරන්න තියන වෙලාවට ස්ටඩි හෝල් එකට යන්න ඕන.ස්ටඩි  හෝල් එක කිවුවාට ඩයනින් හෝල් එක විධියට පාවිච්චි කරන්නෙත් ඒකමයි . 11 වසරේ සමහර අය ස්ටඩීස් වලට ස්ටඩි හෝල් එකට යන්නේ නැහැ, ඩෝමෙට්‍රියේ ඉඳන්ම පාඩම් කරනවා. උදේටත් ස්කෝලේ  යන්න කලින් පැයක් පාඩම් කරන්න ඕන. ඉතින් පරිසර තත්ත්ව සලකා බලද්දී සමාන තත්ත්වය න් තමයි අවටින් පෙන්නුම් කරන්නේ.

නීලිකා අවදි කරන්න කියලා කියපු වෙලාවත් ඇවිත්. කෙටි නින්ද වල් ගන්න නිසාද මන්දා දීපිකා ලොකු උත්සාහයක් ගත්තා නීලිකා ඇඳෙන් නැගිට්ටවන්න, ඒත් බැරි වුණා . කතා කළා කළා. නීලිකා නෙමෙයි අවදි වුණේ .මොනවා කරන්නද? ඒ වුණත් දීපිකා පරාජය පිළි ගන්න කැමති කෙනෙක්  නම් නෙමෙයි. කීප වතාවක් කතා කරලත් බැරිම තැන ඩෝමෙට්‍රියේ හිටි කීප දෙනා එක්ක රහසේ කතාවක් කළා.

හදිසියේම වගේ

 "නීලිකා  නීලිකා නැගිටින්න.මොකද අද ස්කෝලේ යන්නේ නැද්ද? දැන් හොඳටම පරක්කු වෙලා.ස්ටඩීස් වෙලාවත් ඇවිත්."

ස්කෝලේ නොගිහින් නවතින වැඩේ නම් ඒ තරම් හොඳ දෙයක් නෙමෙයි. ඒ නිසා වෙන්න ඇති දඩි බිඩියේ නීලිකා අවදි වුණා. ඇත්තටම නැගිට්ටා නෙමෙයි ඇඳෙන් පැන්නා. 

වටපිට බැලුවා. සාමාන්‍යයෙන් පරක්කු වෙලා යුනිෆෝම් දාගන්න සෙට් එක තමයි ඉන්නේ. සමහර අය කොණ්ඩේ පීරනවා . සමහරු පොත් හදනවා ටයිම් ටේබල් එක බල බලා.ඩෝමෙට්‍රියේ ඉන්නෙත් ටික දෙනයි. නිලීකා නො දන්නවා වුණාට 11 වසරේ අය බොහෝ දෙනෙක් ඒ වෙද්දී එහෙන් මෙහෙන් හොරෙන් එබිකම් කරමින් හිටියා. තැන් තැන් වල පාඩම් කරමින් හිටි අය වගේම, ස්ටඩි හෝල් එකේ හිටි අයත්.

 හැමදාම වගේ බාගෙට පියවුණ ඇස් දෙකත් අරගෙන, ඇත්තම කිවුවොත් තනි ඇහෙන් දත් බුරුසුවට දත් බෙහෙත් දාගෙන, සබන් කෑල්ලත් ,තුවායත් අරන් නීලිකා පහළට ගියා. බොහොම ඉක්මණට මුණ කට හෝදගෙන ඇවිත් යුනිෆෝම් එක දා ගත්තා. තකහනියෙම කොණ්ඩෙත් පීරා ගත්තේ පරක්කු වෙලා නිසා. 

හැමෝම උදේට කන්නේ නැහැ. සමහර අය ඉන්ටර්වල් එකට ඇවිත් කන්නේ උදේ කෑම එක. එහෙම හිතලා වෙන්න ඇති, සමහර විට පරක්කු නිසාත් වෙන්න ඇති පොත් ටිකත් සුදානම් කරගෙන නීලිකා ඩෝමෙට්‍රියේ දොරෙන් එළියට එන්න ආවා.

එහෙන් මෙහෙන් හැංගිලා හිටි අය ඔක්කොම මහා හයියෙන් හිනා වෙවී හූ සංග්‍රහයක් එක්කම ඩෝමෙට්‍රියේ ඇතුළට ආවා. මීටර් අවුට් වෙච්ච නීලිකා තුෂ්නිම්භූත වෙලා වගේ බලා ගෙන ඉන්නවා.

ස්ටඩිස් වලට බාධා වෙන්න මහා හයියෙන් හූ තියන 11 වසරේ ඇත්තන් මට්ටු කරන්න මේට්‍රන් මිස් වේවැලත් අතින් අරන් ආවේ දෙතුන් දෙනෙක් වත් කෝටු මස් කරන්න හිතාගෙන වෙන්න ඇති.

නීලිකා වට කරගෙන හිනා වෙවී ඉන්න මේ වදකාරයන් ටිකට කෝටු පාරවල් දෙන්න හිතා ගෙන එතැනට කඩා පාත් වුණ මේට්‍රන් මිස් ටත් අන්ද මන්දයි.

යාන්තමට කට කොණට මෝදු වෙච්ච නෝන්ඩි හිනාවෙන් මේට්‍රන් මිස් 

"මොකද නීලිකා මේ. ඇයි රෑටත් ස්කෝලේ තියනවාද ඔයාට විතරක්....."



23 comments:

  1. නිදාගෙන ඉඳලා එකපාරට අවදි වුනම උදේ රැ මාරුවීම මටත් වෙලා තියෙනවා. නියම කතාව

    ඇත්තටම ලංකාවේ ඉන්නේ ලිංගික කුහකයෝ පිරිසක් ලිංගිකත්වය වැඩිපුර හංගන්න ගියාම ඔහොම වෙනවා. මාහා ලොකුවට ඉන්නා උපාසකයෝ වුනත් අන්තර්ජාලයේ වැඩිපුරම සෙක්ස් හොයන්න යනවා කියන එකට ලොකුම සාක්ෂිය තමයි ලාංකිකයන් facebook යනවාටටත් වඩා සෙක්ස් සොයා තියෙනවා. ඒ වගේම ඒ වචනය සොයා පිට පිට සිවු වතාවක් ලෝකෙන්ම එක (මෙන්න ඒ ගැන මගේ අලුත්ම සමීක්ෂණය) මෙහෙම උනත් හැමෝම හැසිරෙන්නේ අපි ඕවාට නැහැ කියලා. සමහරු ඉන්නවා හැම කෙල්ලෙක් ගැහැනියක් දිහාම බලන්නේ ගණිකාවක් ලෙස. හිනවුනත් ලිංගිකව හැසිරෙන්න කැමතියි කියා හිතන උනුත් ඉන්නවා, හැම හොස්ටල් ඉන්න හැම කෙල්ලෙක් දිහාම සමලිංගික කෙල්ලෙක් ලෙස බලනවා.
    අනෙක කෙල්ලෙක් තව එකෙක් එක්ක සමලිංගික ව හිටියත් අනෙක් උන්ට ඇති අමාරුව මොකක්ද? ඔක්කොටම මුල අපේ අය ගේ හිස්ටීරියාව.

    ReplyDelete
    Replies
    1. අදහස් දැක්වුවාට ස්තුතියි.ඒ කටුක කාලයේ පොඩි මිහිරියාවක් වත් තියෙන්නේ ඔය විධියේ පිස්සු වැඩ නිසා තමයි.

      Delete
  2. මටත් මේ ලිපියට දෙයක් එකතු කරන්න දෙයක් තියෙනවා....
    ලංකාවේ ඉන්න ගොඩක් අය හිතන්නේ...ගෑනු ලමයෙක් හොස්ටල් හිටියා කියන්නේ එයා ලෙස්බියන් කියලා... එතකොට ලංකාවේ ඉන්න ලෙස්බියන්ලා ඔක්කොම හොස්ටල් වල ඉන්න හෝ හිටපු අයද? මොන බොරු ද.. මම දන්න කීපදෙනෙක් ඉන්නවා ඔවුන් විවාහ වී දරැවනුත් ඉන්නවා නමුත් ඔවුන් ලෙස්බියන්ලා..
    ඇයි මේ හොස්ටල් කියන වචනයක් ඇහුනහම වපරැහින් බලන්නේ...!!!
    මේ කුහක පිරිමි සමාඡය තමයි, කාන්තාවන් හා බාලිකා පාසල්. සමලිංගිකයි කිය කිය අපකීර්තියට පත් කරන්නෙ... ඉස්සර මම හිටියෙත් හොස්ටල් එකක, එකෙත් එහෙම අයත් හිටියා. නමුත් හැමෝම එහෙම වුනේ නෑ. අපිත් විවාහ වෙලා සාර්ථකව ඡීවිතය ගතකරන්නේ ඒ නිසයි....

    ReplyDelete
    Replies
    1. ඔවු නදී. ඔතැන ප්‍රශ්නය තියෙන්නේ බාලිකා පාසල් හා නේවාසිකාගාර ගැන විතරයි. එතකොට බාලක පාසල් හා නේවාසිකාගාර ගැන හ්ම්ම්.... නෑ .

      එක තැනක දෙයක් වුණාම සමස්ථ ප්‍රජාවටම බැණුම්

      එක මකුණයි ළමයෝ කන්නේ. ඇයි ඔක්කොම මකුණෝ මරන්නේ.........

      Delete
  3. ඔය කාලෙ මගේ ෆේවරිට් කතාව...

    ‘‘... අනේ සමාජෙට බම්බු ගහන්න කියන්න.... ‘‘

    ReplyDelete
    Replies
    1. ඒක ඒ කාලෙට විතරක් සීමා වෙලා නැහැනේ හිරූ ....

      Delete
  4. හපොයි උතුරු දකුණ මාරුවුණ කෙල්ලො හිහි

    ReplyDelete
  5. මහා රෑ නැගිට්ටම ඔය වයර් මාරුවෙන සීන් එක මට තදටම තිබ්බා

    ReplyDelete
  6. "කෙටි නින්ද වල් ගන්න නිසාද මන්දා"

    මේ මොකද්ද මේ කතාවෙ තේරුම බං?

    ReplyDelete
    Replies
    1. මම එතැනදී අදහස් කළේ, පැයක දෙකක කාලයක් වගේ නිදා ගන්න බව.එක දිගට පැය 7-8 නිදා නො ගත් නිසා.

      Delete
  7. මම හොස්ටල් ජීවිතය අත් දැකලා නෑ..මම ආශ්‍රය කරන කිසිම යාලුවකෙුත් එහෙම නෑ...ඒ නිසා මේ අත්දැකීම් මට කිසි ලෙසකින් සමීප දේ නෙමෙයි...මේට්‍රන්ලා ළමයින්ට ගහනවද වේවැල් අරගෙන...මම හිතුවෙ සැර කරනවා විතරයි කියලා.

    ReplyDelete
    Replies
    1. සැර කරලා විතරක් බේර ගන්න පුළුවන් වේවි කියලා සිරා හිතනවද? ඒත් පවු අනේ මේට්‍රන් මිස්ට වේවැල් නම් කීයක් කියලා ගෙන්න වුණාද අපේ අය ගෙන් බේර ගන්න බැරුව. වරදවා හිතන්න එපා ගුටි කාලා වේවැල් කැඩුන නිසා නෙමෙයි. වේවැල් හංගපු නිසා. හී ...හී

      Delete
    2. ඔය මේට්‍රන් එතකොට දිවා රාත්‍රී හොස්ටල් මුර කරන එක විතරද කරන්නෙ...එයා පාසලේ කටයුතු වලට සම්බන්ධ වෙන්නෙ නැද්ද ?

      Delete
  8. මමත් පාසල්කාලේ නම් හොස්ටල් ජීවිතේ විදලා නැහැ............ ඒත් කැම්පස් කාලේ නම් වින්දා.......... ඒක ටිකක් වෙනස් නොවැ.............

    ReplyDelete
    Replies
    1. කැම්පස් හොස්ටල් වල නිදහස නො සෑහෙන්න තියනවනේ ස්කෝලේ හොස්ටල් එක්ක බලනකොට.

      Delete
  9. මට කවදාවත් හොස්ටල් එකක ඉන්න ලැබිලා නෑ.. ඒත් හොස්ටල් බිල්ඩින් එක දැක්කම ඒකේ ඉන්න තිබුනනම් කියලා හිතිලා තියනවා...ඒත් අපේ හොස්ටල් එකේ නම් හොල්මන් තියනවා කියලා කාලයක් වහලත් තිබුනා.

    ReplyDelete
    Replies
    1. මම නම් හිතන්නේ හොල්මන් කරන්නේ ඇත්තේ හොස්ටල් එකේ හිටිය අය ම වෙන්න ඇති. කාලයක් විතරක් වහලා තිබිලා ආයෙම පටන් ගත්තාම හොල්මන් ඉඳලා නැද්ද?

      Delete
  10. අපරාදේ පන්තියටම යන්න දෙන්න තිබ්බේ . . . . . .

    ReplyDelete
    Replies
    1. එහෙම කරන එක පවුනේ.එච්චර දුර යද්දී වැඩේ මාට්ටු වෙනවා අනිත් අය යන්නේ නැති නිසා...

      Delete
    2. මෙයාට කියන්නෙ පොල්වත්තේ මල්කොබා කියලයි බට්ටි...වෙලාවක ඒ පැත්තෙ ගිහින් බලන්න.

      Delete
  11. ඔය මෙට්‍රන්ලා කියන එවුන්ගේ පිනට වෙන්න ඕන මම වගේ එකෙකුට හොස්ටල් ඉන්න උනේ නැත්තේ.. එහෙම උනානම් මෙට්‍රන්ට නිතරම දඟයා කාර්ටුන් එකේ විල්සන් මාමාට වෙන අකරතැබ්බ වගේ එව්වා නිරන්තරයෙන්ම සිද්දවෙන්න ඉඩ තිබුන..

    ReplyDelete
  12. දැන් නම් මේට්‍රන් මිස්ලා මොන දුකක් අපි නිසා විඳින්න ඇතිද කියලා දුකත් හිතෙනවා.කී දෙනෙක් ගැන වගකීමක්ද?

    ReplyDelete

කියවලත් කියෙව්වේ නෑ වගේ යන්න එපා. ඔබේ අදහසක් වටිනවා බොහොම. තවත් එක් අකුරක් හෝ ලියන්නට...